CoronaMaharashtraUpdate : राज्यात कोरोनाचा पुन्हा उच्चांक : ३५ हजार ९५२ नवे रुग्ण , १११ मृत्यू
मुंबई । गेल्या २४ तासात पुन्हा एकदा राज्यात कोरोना रुग्णसंख्येचा नवा उच्चांक नोंदवला गेला असून ३५ हजार ९५२ नवीन रुग्णांची नोंद झाली आहे तर २० हजार ४४४ रुग्ण बरे होऊन घरी परतले आहेत. गेल्या २४ तासांत १११ करोना बाधित रुग्णांचा मृत्यू झाला आहे. दरम्यान, राज्यातील अॅक्टिव्ह रुग्णांचा आकडा वाढून आता तीन लाखांच्या दिशेने सरकला आहे.
राज्यातील गेल्या काही दिवसांतील रुग्णवाढ धडकी भरवणारी आहे. करोनाच्या पहिल्या लाटेच्या तुलनेत दुसरी लाट अधिक तीव्र असल्याचे स्पष्ट होत आहे. दैनंदिन रुग्णसंख्येचा आकडा सतत नवे उच्चांक गाठत आहे. गेल्या २४ तासांत राज्यात करोनाचे तब्बल ३५ हजार ९५२ नवीन रुग्ण आढळले असून एका दिवसातील रुग्णसंख्येचा आजवरचा हा सर्वोच्च आकडा ठरला आहे. मुंबई, पुणे, नागपूर, नाशिक या प्रमुख महानगरांतील स्थिती सर्वात गंभीर असून एकट्या मुंबईतच आज ५ हजार ५०५ नवीन रुग्णांची भर पडली आहे. पुणे पालिका हद्दीत आज ३ हजार ३४० नवे रुग्ण आढळले असून नागपूर पालिका हद्दीत २ हजार ६५६ रुग्ण वाढले आहेत. नाशिक पालिका हद्दीत २४ तासांत २ हजार ३०४ नवे रुग्ण आढळले.
राज्यातील अॅक्टिव्ह रुग्णांची एकूण संख्या आता २ लाख ६२ हजार ६८५ इतकी झाली असून पुणे जिल्ह्याने ५० हजारचा टप्पा आज पार केला आहे. पुणे जिल्ह्यात सध्या ५० हजार २४० अॅक्टिव्ह रुग्ण आहेत. त्यानंतर नागपूर जिल्ह्यात हा आकडा ३५ हजार ७९५, मुंबईत ३२ हजार ५२९ तर ठाणे जिल्ह्यात २५ हजार १३० इतका आहे. या तिन्ही शहरांत करोना चाचण्यांची संख्या वाढवल्याने रुग्णसंख्येत मोठी वाढ दिसत असल्याचे प्रशासनाकडून सांगण्यात येत आहे.
महाराष्ट्र कोरोना अपडेट
राज्यात आज ३५ हजार ९५२ नवीन रुग्णांचे निदान.
२४ तासांत २० हजार ४४४ रुग्ण बरे होऊन घरी.
आज १११ करोना बाधित रुग्णांच्या मृत्यूंची नोंद. मृत्यूदर २.०७ टक्के
राज्यातील रुग्ण बरे होण्याचे प्रमाण (Recovery Rate) ८७.७८ टक्के
आजपर्यंत तपासण्यात आलेल्या १ कोटी ८८ लाख ७८ हजार ७५४ प्रयोगशाळा नमुन्यांपैकी २६ लाख ८३३ (१३.७८ टक्के) नमुने पॉझिटिव्ह आले आहेत.
सध्या राज्यात १३ लाख ६२ हजार ८९९ व्यक्ती होमक्वारंटाईनमध्ये आहेत तर १३ हजार ७७० व्यक्ती संस्थात्मक क्वारंटाईनमध्ये आहेत.
राज्यात आजपर्यंत एकूण २२ लाख ८३ हजार ३७ कोरोना बाधित रुग्ण बरे होऊन घरी.