#CoronaVirusUpdate : काय झाले आज महाराष्ट्रात ? जाणून घ्या अधिकृत माहिती…
मुंबई पुण्यासह आज राज्यात आज कोरोनाचा संसर्ग झालेल्या ४३१ नवीन रुग्णांची नोंद झाल्याने एकूण रुग्णसंख्या ५६४९ झाली आहे. ६७ रुग्णांना डिस्चार्ज करण्यात आले असून, राज्यभरात बऱ्या झालेल्या रुग्णांची संख्या ७८९ आहे. तर एकूण ४५९१ रुग्णांवर उपचार सुरू आहेत, अशी माहिती आरोग्यमंत्री राजेश टोपे यांनी दिली. दिवसभरात राज्यात १८ जणांचा मृत्यू झाला आहे. त्यामुळं मृत्यूची एकूण संख्या २६९ झाली आहे. आजपर्यंत पाठविण्यात आलेल्या ९० हजार २२३ नमुन्यांपैकी ८३ हजार ९७९ जणांचे प्रयोगशाळा नमुने करोनाकरिता निगेटिव्ह आले आहेत, तर ५६४९ जण पॉझिटिव्ह आले आहेत. सध्या राज्यात १ लाख ९ हजार ७२ लोक होम क्वारंटाइनमध्ये असून ८,०५१ लोक संस्थात्मक क्वारंटाइनमध्ये आहेत.
राज्यभरात आज १८ करोनाबाधित रुग्णांचा मृत्यू झाला आहे. राज्यात झालेल्या मृत्यूंची एकूण संख्या आता २६९ झाली आहे. आज झालेल्या मृत्यूपैकी मुंबई येथील १०, पुणे येथे २, औरंगाबाद येथे २ तर कल्याण-डोंबिवली येथील १, सोलापूर मनपा येथील १, जळगाव येथे १ आणि मालेगाव येथील एक रुग्ण आहे. आज झालेल्या मृत्यूंपैकी १४ पुरुष, तर ४ महिला आहेत. त्यात ६० वर्षे किंवा त्यावरील ५ रुग्ण आहेत. तर १२ रुग्ण हे वय वर्षे ४० ते ५९ या वयोगटातील आहेत तर एक रुग्ण ४० वर्षांखालील आहे. या १८ मृत्यूंपैकी १२ रुग्णांमध्ये ( ६१ टक्के) मधुमेह, उच्च रक्तदाब, हृदयरोग अशा स्वरुपाचे अतिजोखमीचे आजार आढळले आहेत.