जेएनयू हिंसाचार, तोडफोड प्रकरणी विद्यार्थी संघटनेच्या अध्यक्षा आइशी घोषसह अनेक विद्यार्थी आंदोलकांना नोटिसा
https://twitter.com/ANI/status/1215595985574907904
दिल्लीतील हिंसाचाराची देशभर चर्चा होत असताना या प्रकरणाच्या तपासाची सूत्रे वेगाने फिरवली जात असली तरी जेएनयूमधील सर्व्हर रुमची तोडफोड केल्याप्रकरणी पोलिसांनी दहा जणांची ओळख पटवली आहे. त्यात जेएनयू विद्यार्थी संघटनेच्या अध्यक्षा आइशी घोषसह जेएनयूचा माजी विद्यार्थी चुनचुन कुमार, सुचेता आणि प्रिया रंजन यांचा समावेश असल्याची माहिती पोलिसांनी दिली. ओळख पटलेल्या सर्वच्या सर्व विद्यार्थ्यांना नोटीस पाठवून स्पष्टीकरण मागण्यात येणार आहे.
या तपासाबाबत दिल्ली पोलिसांच्या गुन्हे अन्वेषण विभागाने पत्रकार परिषद घेऊन ही माहिती दिली. जेएनयूत नोंदणी करण्यास डाव्या विचारसरणीच्या विद्यार्थ्यांचा विरोध होता. १ जानेवारी ते ५ जानेवारीच्या दरम्यान नोंदणी प्रक्रिया थांबवण्यापासून ते सर्व्हरची तोडफोड करण्यापर्यंत आणि पेरियार तसेच साबरमती हॉस्टेलमध्ये झालेल्या हिंसेचा तपशील यावेळी पोलिसांनी दिला. ३ जानेवारी रोजी स्टुडंट फ्रंट ऑफ इंडिया, ऑल इंडिया स्टुडंट्स फेडरेशन, ऑल इंडिया स्टुडंट्स असोसिएशन आणि डेमोक्रॅटिक स्टुडंट्स फेडरेशनचे सदस्य मध्यवर्ती नोंदणी प्रक्रियेची यंत्रणा रोखण्यासाठी सर्व्हर रुममध्ये घुसले. त्यानंतर त्यांनी सर्व्हर बंद करून कर्मचाऱ्यांना रुमच्या बाहेर काढलं. ४ जानेवारी रोजी पुन्हा त्यांनी सर्व्हर बंद करण्याचा प्रयत्न केला. दुपारी काचेच्या दरवाज्यातून काही विद्यार्थी आतमध्ये घुसले आणि त्यांनी सर्व्हर सिस्टीमची तोडफोड केली. त्यामुळे नोंदणीची सर्व प्रक्रिया थांबली. या दोन्ही प्रकरणात एफआयआर नोंदवण्यात आला आहे.
या शिवाय ज्या घटनेची देशभर चर्चा आणि निषेध , आंदोलन होत आहे ती घटना दि. ५ जानेवारी रोजी कँम्पसमध्ये हिंसक घटना घडली. दुपारी पेरियार हॉस्टेलमध्ये चेहरा झाकून आलेल्या काही जणांनी विद्यार्थांवर हल्ला केला. हल्लेखोरांच्या या गर्दीत आइशी घोषही होती. त्यानंतर काही विद्यार्थांनी साबरमती हॉस्टेलमध्येही हल्ला केला. त्यातीलही काही विद्यार्थ्यांची ओळख पटली आहे, असं गुन्हे अन्वेषण विभागाचे डीसीपी जॉय टिर्की यांनी म्हटलं आहे.
पोलिसांच्या म्हणण्यानुसार जेएनयूचे माजी विद्यार्थी चुनचुन कुमार, पंकज मिश्रा, आइशी घोष, पंकज कुमार, वास्कर विजय, सुजेता तालुकदार, प्रिया रंजन, डोलन सावंत, योगेंद्र भारद्वाज आणि विकास पटेल आदींनी सर्व्हर रुमची तोडफोड केल्याचं पोलिसांनी सांगितलं. सीसीटीव्ही फुटेजद्वारा या विद्यार्थ्यांची ओळख पटली आहे. ३ आणि ४ जानेवारी दरम्यान वायफायचीही तोडफोड झाली होती. त्यामुळे सर्व्हर उद्ध्वस्त झाले होते. त्यामुळे या हल्ल्यातील सीसीटीव्ही फुटेज मिळाले नाही. व्हायरल व्हिडिओ आणि फोटोंच्या सहाय्याने हल्लेखोरांची ओळख पटवली जात आहे.
दरम्यान पोलिसांना तपासात काही व्हॉट्सअॅप ग्रुप मिळाले आहेत. हल्ल्याच्या काळातच हे ग्रुप तयार करण्यात आले होते. त्यापैकी युनिटी अगेन्स्ट लेफ्ट हा व्हॉट्सअॅप ग्रुपही असून त्याद्वारे हिंसेला चिथावणी दिल्याचं पोलिसांनी म्हटलं. पोलिसांनी दिलेल्या माहितीनुसार, चेहरा झाकून आलेल्या हल्लेखोरांना जेएनयूच्या कँम्पसची खडा न् खडा माहिती होती. त्यामुळे ते सहजपणे एका हॉस्टेलमधून दुसऱ्या हॉस्टेलमध्ये जात होते. बाहेरची व्यक्ती असती तर तिला कँम्पसची एवढी माहिती असूच शकली नसती.