भाजपच्या विजय संकल्प रॅलीत मोदींनी दाखवले देशाचे ‘इस्रो स्पिरीट’, ‘हंड्रेड डेज ‘ च्या कामगिरीचा वाचला पाढा
देशाला ‘इस्रो स्पिरीट’ने सकारात्मकतेची एक वेगळी प्रेरणा दिली आहे. चांद्रयान – २ मोहिमेनंतर देशवासीय यश-अपयशाच्या पलीकडे पाहत आहेत, असं प्रतिपादन पंतप्रधान नरेंद्र मोदी यांनी केलं आहे. भाजपच्या ‘विजय संकल्प’ रॅलीत ते बोलत होते.
हरयाणात येत्या ऑक्टोबरमध्ये विधानसभा निवडणुका होत आहेत, त्या पार्श्वभूमीवर या रॅलीचं आयोजन करण्यात आलं होतं. मोदी म्हणाले, ‘७ सप्टेंबरच्या मध्यरात्री १.५० वाजल्यानंतर १०० सेकंद जे घडलं त्यामुळे संपूर्ण देशाला एकसंध केलं आहे. खिलाडूवृत्तीप्रमाणे देशात इस्रो स्पिरीटची लाट पसरली आहे. देशातले लोक नकारात्मकेचा स्वीकार करायला तयार नाहीत. आशेची, विश्वासाची शक्ती काय असते, दृढनिश्चय, क्षमता काय असते ते त्या १०० सेकंदात देशाने पाहिलं. यशापयशापलिकडचं स्वप्न पूर्ण करण्याची ताकद देशाला त्या १०० सेकंदांनी दिली.’
काँग्रेसचा गड मानल्या जाणाऱ्या हरयाणात आज केंद्र सरकारच्या १०० दिवसांच्या कामगिरीची माहिती मोदींनी दिली. पूर्वी दिल्लीत पंतप्रधानांचा जयजयकार करणाऱ्या लोकांना ट्रक भरभरून दिल्लीत नेणाऱ्याला हरयाणाचा मुख्यमंत्री केलं जात असे, अशी टीका मोदींनी काँग्रेसचं नाव न घेता केली.