गळफास घेऊन प्रेमी युगुलाने आत्महत्या

घुग्घुसपासून जवळच असलेल्या पांढरकवड़ा ते शेनगाव रस्त्याजवळील शेतामध्ये एका झाडावर गळफास घेऊन प्रेमी युगुलाने आत्महत्याकेल्याची घटना उघडकीस आली आहे. हरीश लोडे यांच्या शेतात सकाळी दहाच्या सुमारास रस्त्यावरुन जाणाऱ्या ग्रामस्थांना हे युगुल एकाच ओढणीने गळफास घेतलेल्या अवस्थेत दिसून आले. त्यानंतर घुग्घुस पोलिसांना याची माहिती देण्यात आली.

आत्महत्या केलेल्या प्रेमी युगुलाची ओळख पटली असून मृतक स्त्री ही सुनिता अमित मिले(२६ वर्षे) राहणार नकोडा आणि पुरुष हा राजेश गेडाम(२८ वर्षे) राहणार सेलू जिल्हा वर्धा, अशी दोघांची नावं आहेत. सुमिता मिले ही रविवार रात्रीपासून बेपत्ता होती. कुटुंबीयांनी सर्वत्र शोध घेतला असता ती कुठेही आढळून आली नाही. सदर स्त्री व पुरुष दोघेही विवाहित असून मृतक सुनीताला सहा वर्षे वयाची मुलगी सुद्धा असल्याचे कळते. शेताच्याकडेला राजेश गेडाम याची दुचाकीसुद्धा पोलिसांना आढळून आली आहे. या संपूर्ण प्रकरणाचा तपास पोलीस करत आहेत.