विश्व कप : इंग्लंडचा द.आफ्रिकेवर १०४ धावांनी दणदणीत विजय
वर्ल्डकप स्पर्धेच्या सलामीच्या लढतीत यजमान इंग्लंडने दक्षिण आफ्रिकेवर १०४ धावांनी दणदणीत विजय प्राप्त केला आहे. इंग्लंडच्या ३१२ धावांच्या आव्हानाचा पाठलाग करताना द.आफ्रिकेला केवळ २०७ धावांपर्यंतच मजल मारता आली. इंग्लंडकडून जोफ्रा आर्चरने तीन विकेट्स घेतल्या. तर लियाम प्लंकेट, बेन स्टोक्स यांनी प्रत्येकी दोन गडी बाद केले. याशिवाय, आदिल रशीद आणि मोईन अली यांनीही प्रत्येकी एक विकेट घेतली. द.आफ्रिकेकडून सलामीवीर क्विंटन डी कॉकने सर्वाधिक ६८ धावांची खेळी साकारली. तर रासी दुसेन याने अर्धशतकी खेळी साकारली. हे दोन फलंदाज वगळता द.आफ्रिकेकडून इतर कोणताही खेळाडू चांगली कामगिरी करु शकला नाही.
तत्पूर्वी, प्रथम फलंदाजी करणाऱ्या इंग्लंड संघाने दक्षिण आफ्रिकेसमोर ३१२ धावांचा डोंगर उभारला. इंग्लंडकडून सलामीवीर जेसन रॉय(५४), जो रुट (५१), कर्णधार इऑन मॉर्गन (५७) यांनी अर्धशतकी खेळी साकारली. तर अष्टपैलू बेन स्टोक्सने ८९ धावांचं बहुमोलाचं योगदान दिलं. उत्तम सांघिक कामगिरीच्या जोरावर इंग्लंडने आफ्रिकेसमोर आव्हानात्मक धावसंख्या उभारली.