पुण्यातील जर्मन बेकरी बॉम्बस्फोट प्रकरणातील आरोपी कुख्यात यासीन भटकळवर आरोप निश्चित
पुण्यातील जर्मन बेकरी बॉम्बस्फोटातील मुख्य आरोपी व इंडियन मुजाहिद्दीनचा सहसंस्थापक कुख्यात दहशतवादी यासीन भटकळ उर्फ शिवानंद (रा. भटकळ, जि. उत्तर कनडा, कर्नाटक) याच्यावर सोमवारी शिवाजीनगर कोर्टात आरोप निश्चित करण्यात आले. या खटल्याची सुनावणी विशेष न्यायाधीश किशोर वडणेयांच्या समोर सुरू आहे. भटकळला हैद्राबाद बॉम्बस्फोट प्रकरणी यापूर्वीच फाशीची शिक्षा सुनावण्यात आली आहे.
जर्मन बेकरी बॉम्बस्फोट खटल्याच्या सुनावणीच्या तारखांना बऱ्याच वर्षापासून भटकळला कोर्टासमोर हजर केलेले नव्हते. भटकळ याच्यावर आरोप निश्चित करायचे असल्यामुळे त्याला कोर्टात हजर करावे, अशी नोटीस कोर्टाने दहशतवाद विरोधी पथकाला (एसीटीएस) काढली होती. त्यानुसार सोमवारी सकाळी भटकळला तिहार कारागृहातून शिवाजीनगर कोर्टात हजर करण्यात आले होतो. कोर्टात हजर केल्यानंतर कोर्टाने भटकळ याला त्याच्यावरील आरोप वाचून दाखविले. त्यानंतर त्याच्यावरील आरोप निश्चित केले. भटकळला सुरक्षेच्या कारणावरून पुढील सुनावणींना तिहार कारागृहातून व्हिडीओ कॉन्फरन्सिंगद्वारे कोर्टात हजर करण्याची मागणी दिल्ली पोलिसांचे सहायक पोलिस आयुक्त विरेश्वर मलीक यांनी कोर्टाकडे केली. त्याला भटकळचे वकील जहिरखान पठाण यांनी विरोध केला. भटकळ याला कोर्टात हजर करूनच खटल्याची सुनावणी सुरू करण्याची मागणी त्यांनी केली. तसा अर्ज त्यांनी कोर्टात सादर केला असून या अर्जावर १५ मे रोजी सुनावणी होणार आहे.
पुण्यातील कोरेगावपार्क येथील जर्मन बेकरी येथे १३ फेब्रुवारी २०१० रोजी सायंकाळी सहा वाजून ५० मिनिटांनी झालेल्या बॉम्बस्फोटात १७ जणांचा मृत्यू झाला होता. तर, ५६ नागरिक गंभीर जखमी झाले होते. मृतांमध्ये ५ व जखमींमध्ये १० परदेशी नागरिकांचा समावेश होता. भटकळने बॉम्ब ठेवल्याचे एटीएसच्या तपासात निष्पन्न झाले आहे.