साध्वी प्रज्ञासिंहच्या विरोधात लढताहेत हेमंत करकरे यांचे सहकारी रियाझ देशमुख
साध्वी प्रज्ञासिंह यांच्याकडून दिवंगत एटीएस प्रमुख हेमंत करकरे यांची प्रतिमा कथित रुपात मलीन झाल्याच्या कारणावरून व्यथित झालेले शाहिद हेमंत करकरे यांचे माजी सहकारी निवृत्त एसीपी रियाझ देशमुख यांनी साध्वी प्रज्ञासिंह ठाकूर यांच्या विरोधात लढण्याचा निर्णय घेतला आहे. रियाझ देशमुख यांनी भोपाळ मतदारसंघातून अपक्ष म्हणून आपला उमेदवारी अर्ज दाखल केला असून ते साध्वी प्रज्ञासिंह ठाकून यांच्याविरोधात निवडणूक लढवत आहेत. भोपाळच्या जागेसाठी १२ मे या दिवशी ५ व्या टप्प्यातील मतदान होत आहे.
टाइम्स ऑफ इंडिया’शी बोलताना रियाझ देखमुख म्हणाले कि , साध्वी प्रज्ञासिंह यांनी जेव्हा भोपाळमधून उमेदवारी अर्ज दाखल केला तेव्हाच आपण साध्वीविरोधात निवडणूक लढायची, असा निर्णय घेतला होता . मुंबई पोलिसातील सर्वात उत्तम आणि प्रामाणिक पोलीस अधिकाऱ्याची बदनामी होताना आपण पाहू शकत नसल्याचे ते म्हणाले. करकरे यांनी नेहमीच मला चांगले मार्गदर्शन केले आहे. ते नेहमीच माझ्या बाजूने उभे राहिले आहेत, असेही देशमुख म्हणाले. २००८च्या मालेगाव बॉम्बस्फोट प्रकरणातील आरोपी साध्वी प्रज्ञासिंह ठाकूर यांना २०१७ मध्ये जामीन मंजूर होण्यापूर्वी त्यांनी ९ वर्षे तुरुंगात घालवलेली आहेत. आजारपणाच्या कारणावरून त्यांना कोर्टात सुनावणी दरम्यान व्यक्तिगत रुपात हजर न राहण्याची सूट मिळाली आहे.
कोण आहेत रियाझ देशमुख
रियाझ देशमुख सन २०१६ मध्ये अमरावतीमधून एसीपी या पदावर असताना निवृत्त झाले. गेल्या ३ वर्षांपासून ते अमरावतीत राहात आहेत. त्यांनी ३ दशकाहून अधिक काळ पोलीस दलात सेवा दिली आहे. निवृत्त झाले तेव्हा ते अमरावतीच्या गुन्हे शाखेचे प्रमुख होते. तत्पूर्वी ते अमरावतीतच गुन्हे शाखेत पोलीस निरीक्षक होते.
निवृत्त झाल्यानंतर त्यांनी औरंगाबादमध्ये एक वेब पोर्टल सुरू केले. शिवाय ते पोलीस कर्मचाऱ्यांना कायदेशीर प्रकरणात सल्ला देण्याचे कामही करत असत. १९८६ च्या बॅचचे असलेल्या देशमुख यांनी अकोल्यात ९ वर्षे सेवा दिली. दरम्यानच्या काळात ते करकरेंच्या संपर्कात आले. १९८८ मध्ये करकरे अकोल्यात पोलीस अधीक्षक पदावर कार्यरत होते. त्या वेळी देशमुख वाशिम पोलीस स्टेशनचे प्रमुख होते. २६/११ च्या दहशतवादी हल्ल्यात करकरे शहीद झाले. तो पर्यंत देशमुख करकरेंच्या संपर्कात होते.