बाबरी मशीद प्रकरणी केलेल्या वक्तव्यावरून साध्वी प्रज्ञावर गुन्हा दाखल करण्याचे निवडणूक आयोगाचे आदेश
बाबरी मशीद प्रकरणी दिलेलं वक्तव्य भाजपच्या भोपाळच्या उमेदवार साध्वी प्रज्ञासिंह ठाकूर यांना भोवलं असून त्यांच्याविरोधात एफआयआर नोंदवण्याचे आदेश निवडणूक आयोगाने पोलिसांना दिले आहेत. बाबरी मशीद पाडण्यात सहभागी झाल्याबद्दल मला त्याचा अभिमानच आहे, असं वक्तव्य साध्वी प्रज्ञासिंह यांनी केलं होतं. त्याची निवडणूक आयोगाने गंभीर दखल घेऊन प्रज्ञासिंह यांना नोटिस बजावली होती. अयोध्याप्रकरणी दिलेल्या वक्तव्याविरोधात आम्ही साध्वींविरोधात एफआयआर नोंदवत आहोत. टी. टी. नगर पोलीस ठाण्यात हा एफआयआर नोंदवला जाणार असल्याचं जिल्हा निवडणूक अधिकारी आणि जिल्हाधिकारी सुदाम खाडे यांनी सांगितलं.
तर आचारसंहिता भंग केल्याबद्दल साध्वींविरोधात एफआयआर नोंदवला जात आहे, असं उपन्यायादंडाधिकारी संजय श्रीवास्तव यांनी स्पष्ट केलं. ‘आपण केवळ बाबरी मशिदीवर चढलो नव्हतो, तर तिला पाडण्यासाठीही मदत केली होती. ईश्वरानेच मला ही संधी दिली, शक्ती दिली आणि मी हे काम केले, याचा मला अभिमान आहे. आता आम्ही राम मंदिरही उभारू’ असं वादग्रस्त वक्तव्य साध्वींनी एका मुलाखतीत केलं होतं. शिवाय वक्तव्यमागे घेणार नसल्याचंही त्यांनी स्पष्ट केलं होतं.