Mission Shakti : मोदींच्या भाषणानंतर… राहुल गांधी यांनी दिलेल्या मोदींना रंगभूमी दिनाच्या शुभेच्छा
भारताच्या ‘मिशन शक्ती’ या महत्त्वाकांक्षी अभियानाचे यश जगापुढे मांडणाऱ्या पंतप्रधान नरेंद्र मोदी यांना काँग्रेस अध्यक्ष राहुल गांधी जागतिक रंगभूमी दिनाच्या शुभेच्छा देत मिश्किल टोला हाणला आहे. भारताच्या डीआरडीओने उत्तम कामगिरी केली असून, मला त्यांचा अभिमान आहे, असे म्हणत, याबरोबरच मी पंतप्रधान नरेंद्र मोदी यांना जागतिक रंगभूमी दिनाच्या शुभेच्छा देतो असे ट्विट करत पंतप्रधान मोदी हे उत्तम अभिनेते असल्याचे सूचित केले आहे.
आज सकाळी साडेबाराच्या सुमारास नरेंद्र मोदी यांनी देशाला एक संदेश दिला. या कामगिरीनंतर भारताचा अंतराळातील महासत्ता म्हणून उदय झाला आहे अशी घोषणाही त्यांनी केली. तसंच एक एलइओ उपग्रह उद्ध्वस्त करणारे क्षेपणास्त्र डीआरडीओने विकसित केली असल्याचंही त्यांनी सांगितलं. हे क्षेपणास्त्र आतापर्यंत अमेरिका, रशिया आणि चीन या तीनच देशांनी विकसित केली होती. याबद्दल राहुल गांधींनी डीआरडीओ या संस्थेचं अभिनंदन केलं.
डीआरडीओच्या या यशाचा पंतप्रधान राजकीय फायद्यासाठी वापर करत असल्याचा आरोप विरोधकांकडून केला जात आहे. त्याचप्रमाणे पंतप्रधान नरेंद्र मोदी हे एक उत्तम नट आहेत, कलाकार आहेत अशी टीकाही त्यांच्यावर विरोधकांकडून होत असते. देशाच्या शास्त्रज्ञांचे श्रेय स्वत:कडे घेत मोदी निवडणुकीच्या तोंडावर त्याचा राजकीय फायदा घेत आहेत या टीकेचा धाका पकडूनच राहुल गांधींनी मोदींना ‘रंगभूमी दिनाच्या’ शुभेच्छा दिल्या आहेत अशी चर्चा सोशल मीडियावर सुरू आहे. ही पोस्ट सोशल मीडियावर प्रचंड व्हायरल झाली असून त्यावर सर्वच स्तरातील लोकांनी प्रतिक्रिया दिल्या आहेत.