#CoronaVirusUpdate : कोरोनाला गांभीर्याने घेऊ नका असा संदेश देणाऱ्या “त्या “तथाकथित आयुर्वेदिक डॉक्टरला दणका…
संपूर्ण जग, देश आणि महाराष्ट्र करोना व्हायरसने त्रस्त असताना कोरोनाला गांभीर्याने घेऊ नका , हा चिनी फंडा आहे . सार्स बाबत आपण असेच भाकीत केले होते अशी मुक्ताफळे उधळून लोकांमध्ये चुकीची माहिती पसरवणाऱ्या तथाकथित डॉक्टरला महाराष्ट्र वैद्यकीय परिषदेने (एमएमसी) नोटीस पाठवली आहे. दादरमध्ये काम करणाऱ्या या डॉक्टरचं नाव अनिल पाटील असं आहे. डॉ. अनिल पाटील यांनी काही मुलाखतींमध्ये करोनाला फार गांभीर्याने घेण्याची गरज नाही असं सांगत चुकीची माहिती दिली होती. याची दखल घेत एमएमसीने नोटीस पाठवून स्पष्टीकरण मागितलं आहे. या नोटीसवर एमएमसीचे अध्यक्ष डॉ. शिवकुमार उत्तुरे म्हणाले, ‘एमएमसी नोंदणीकृत डॉक्टर राज्य आणि केंद्र सरकारने जारी केलेल्या शिफारशी आणि मार्गदर्शक सूचनांच्या विरोधात बोलू शकत नाही. आम्ही डॉ. पाटील यांच्याकडून स्पष्टीकरण पाठवलं आहे. त्यावर समाधान न झाल्यास एमएमसीच्या संबंधित कायद्यांनुसार गुन्हा दाखल करण्यात येईल.’
दरम्यान करोना व्हायरस पसरण्यास सुरुवात झाल्यापासून एमएमसीने नोटीस पाठवण्याचा हा पहिलाच प्रकार आहे. दरम्यान, आवश्यक ती पदवी नसतानाही पाटील स्वतःला आयुर्वेदिक डॉक्टर का म्हणून घेतात यावरही एमएमसीने स्पष्टीकरण मागवलं आहे. पाटील यांची नोंदणी एमएमसीकडे एमबीबीएस पदवीधारक म्हणून आहे. त्यामुळे यानुसारच व्यवसाय करायला हवा. पाटील यांनी काही मुलाखतींमध्ये आश्चर्यकारक दावे केले. ते म्हणाले, ‘हा करोना व्हायरस आणि त्याविषयीची भीती निरर्थक आहे. हा व्हायरस उन्हाळ्यात टिकूच शकत नाही. करोना हे संकट नसून चीनची लहर आहे, ज्याचा उद्देश लस आणि मास्कची विक्री वाढवणं हा आहे.’ करोनाविषयी घाबरण्याची आवश्यकता नसल्याचं आपण लेखी द्यायला तयार असल्याचंही डॉ. पाटील म्हणाले होते. Severe Acute Respiratory Syndrome म्हणजेच SARS चा भारतीयांवर काहीही परिणाम होणार नसल्याचा दावा आपण केल्याचंही डॉ. पाटील यांनी मुलाखतींमध्ये सांगितलं.
राज्यात सर्वत्र डॉ. पाटील यांची ही बेजबाबदार मुलाखत सोशल मीडियामध्ये चांगलीच व्हायरल झाली होती. त्यामुळे नागरिक ही मुलाखत पाहून स्वतःकडे दुर्लक्ष करू शकतात अशी भीती प्रशासनाला आहे. करोना व्हायरसच्या बाबतीत एखाद्या डॉक्टरने चुकीची माहिती दिल्यास त्या बाबत कळवण्याचं आवाहन एमएमसीने केलं आहे. डॉ. पाटील यांचं दादरमध्ये एक क्लिनिक असून ते स्वतःला आयुर्वेदिक डॉक्टर असल्याचं सांगतात.