एकट्यानेच चिकन करी फस्त केल्याने मित्रांनीच केला मित्राचा खून
मुंबईच्या अंधेरीत मित्राने एकट्यानेच संपूर्ण चिकन करी फस्त केली म्हणून संतप्त झालेल्या दोन मित्रांनी त्याची हत्या केल्याची धक्कादायक घटना अंधेरीत घडली आहे. हे तिघेहीजण कचरावेचक आहेत. पोलिसांनी दोन्ही आरोपींना अटक केली असून अधिक तपास करत आहेत. सुनील नेपाली असं या मृत तरुणाचं नाव आहे. अंधेरी मेट्रो स्टेशनच्या खाली हा प्रकार घडला.
याविषयी पोलिसांनी दिलेली अधिक माहिती अशी कि , सुनील आणि त्याचे मित्र मुथुकुमार नाडर, अनिल कांबळे आणि अर्जुन हे चारहीजण कचरावेचक म्हणून काम करतात. या चौघांनी रविवारी दारू पार्टीचा बेत आखला होता. दारू पार्टी करण्यापूर्वी त्यांनी संध्याकाळीच चिकन करी बनवली होती. त्यानंतर या चौघांनी दारूचा मनसोक्त आनंद घेतला. दारू प्रचंड चढल्यानंतरही नाडर आणि कांबळे हे दोघे आणखी दारू आणण्यासाठी घराबाहेर पडले. त्यावेळी नेपाळी आणि अर्जुन हे दोघेच घरी होते.
दरम्यान थोड्यावेळाने नेपाळीने भूक लागली म्हणून संध्याकाळी बनवलेली संपूर्ण चिकन करी एकट्यानेच फस्त केली आणि झोपी गेला. काही वेळाने नाडर आणि कांबळे घरी आले असता त्यांना चिकन करी संपलेली आढळली. त्यामुळे नाडर आणि कांबळे या दोघांचाही पारा चढला. या संतापाच्या भरात नाडरने नेपाळीच्या छातीत मोठा दगड घातला तर कांबळेने नेपाळीच्या चेहऱ्यावर प्रचंड मारहाण केली, त्यामुळे नेपाळी जागीच ठार झाल्याचं सहार पोलीस ठाण्याचे वरिष्ठ पोलीस निरीक्षक आनंद नगराळ यांनी सांगितलं. या घटनेची माहिती मिळताच आम्ही घटनास्थळी पोहोचलो. तेव्हा नेपाळी यांच्या चेहरा विद्रुप झालेला दिसला. एका बाजूने त्याचा चेहरा अधिकच विद्रुप होता. त्यामुळे ही हत्याच असल्याचा आमचा संशय बळावला, असं पोलीस सूत्रांनी सांगितलं. या घटनेची चौकशी करत असताना पोलिसांनी अर्जुनच्या हालचालींवर लक्ष ठेवून त्याला ताब्यात घेत त्याचीच चौकशी केली. त्यावेळी त्याने दिलेली माहिती आणि कॅमेरा फुटेजच्या आधारे पोलिसांनी नाडर आणि कांबळेला जेरबंद केलं.