डोंगरी दुर्घटनेत मयत ७ आणि जमखी ९ जणांची नावे उघड ,मदत कार्य अद्याप सुरूच
डोंगरी येथे तांडेल स्ट्रीटवरील केसरबाई इमारत कोसळून झालेल्या दुर्घटनेत ७ रहिवासी ठार झाले असून या इमारतीखाली ४० ते ५० रहिवासी दबल्याची भीती व्यक्त केली जात आहे. ही घटना घडल्यानंतर महापालिकेने या इमारतीच्या आजूबाजूच्या धोकादायक इमारती रिकाम्या करण्याचं काम सुरू केलं आहे. तसेच या परिसरात पोलिसांचा मोठा बंदोबस्त ठेवण्यात आला आहे.
सायंकाळी ६ वाजेपर्यंत मिळालेल्या माहिती नुसार जखमींच्या यादीत फिरोज सलमाना, ४५, झीनत रहमान, ३०, आयेशा शेख , ४, अब्दुल रहमान, ३, ( उपचार करून घरी पाठविण्यात आले. ) नावेद सलमान , ३०, इमान हुसेन कलवानी , ३०, सलमा अब्दुल शेख, ४५ ( सर्व जेजे हॉस्पिटल ) तर एक ३ वर्षीय बालकावर हबीब हॉस्पिटल मध्ये उपचार चालू असून त्याची ओळख अद्याप पटलेली नाही. उपचार करून घरी पाठविण्यात आले.
मयत व्यक्तींमध्ये जावेद इस्माईल, ३४, साबिया नासिर शेख , ६०, अब्दुल सत्तार कालु शेख, ५५, मुजम्मिल मन्सूर सलमानी, १५, सायरा रिहाना शेख , २०, रहाणं शहजाद, ४०, कशप्पा अमिराजान , १३ आदींचा समावेश आहे. ( जे जे हॉस्पिटल )
या दुर्घटनेची माहिती मिळताच अग्निशमन दलाचे जवान घटनास्थळी दाखल झाले. बचाव कार्य सुरू असून एनडीआरएफचे पथकही घटनास्थळी दाखल झाले आहेत. या दुर्घटनेतील मृतांचा आकडा वाढण्याची भिती व्यक्त होत आहे. डोंगरीच्या तांडेल स्ट्रीटवरील अब्दूल हमीद दर्गा येथील केसरबाई इमारत कोसळली. ही इमारत चार मजली असून सकाळी ११ वाजून ३० मिनिटांनी ही दुर्घटना घडली.
संपूर्ण चार मजली इमारत कोसळल्याने आतापर्यंत ७ जण ठार झाले असून ९ जण जखमी झाल्याची माहिती समोर आली आहे. इमारतीखाली ४० ते ५० रहिवासी अडकल्याची भीती व्यक्त करण्यात येत आहे. जखमींमध्ये महिला आणि लहान मुलांचा अधिक समावेश असल्याचं स्थानिकांनी सांगितलं. इमारत कोसळल्याने या भागात एकच खळबळ उडाली. स्थानिकांनी तात्काळ घटनास्थळी धाव घेऊन मदतकार्यास सुरुवात केली. अग्निशमन दलाच्या दहा गाड्या, पोलीस आणि एनडीआरएफच्या टीमने घटनास्थळी धाव घेऊन मदतकार्यास सुरुवात केली. या पथकानं आतापर्यंत ढिगाऱ्या खालून काही जणांना सुखरूप बाहेर काढलं असून त्यात एका लहान मुलाचा समावेश आहे.
मातीचा ढिगारा उपसण्याचं काम सुरू करण्यात आलं असून जखमींना बाहेर काढण्याचे प्रयत्न सुरू आहेत. मात्र अत्यंत चिंचोळ्या भागात ही इमारत असल्याने मदतकार्यात अडथळा निर्माण होत आहे. त्यातच या ठिकाणी स्थानिकांनी प्रचंड गर्दी केली असून मदतकार्यात अडथळा येत आहे. दरम्यान, ही इमारत पालिकेच्या धोकादायक इमारतींच्या यादीत नसल्याचं घोषित करण्यात आली नव्हती, असं सूत्रांनी सांगितलं.