तृणमूल-भाजप कार्यकर्त्यांच्या हाणामारीत ८ ठार झाल्याची भीती
प. बंगालमध्ये सत्तारुढ तृणमूल काँग्रेस आणि विरोधी भाजपच्यचा कार्यकर्त्यांमध्ये झालेल्या हाणामारीत सुमारे ८ जण ठार झाल्याची भीती व्यक्त करण्यात येत आहे. या हाणामारीत अनेक जण जखमी झाले आहेत. उत्तर २४ परगण्यात ही हाणामारी झाली. या घटनेवर केंद्रीय गृहमंत्री अमित शाह यांनी अहवाल मागवला आहे. भाजपच्या सूत्रांचा दावा आहे की तृणमूलसमर्थकांनी भाजपच्या पाच कार्यकर्त्यांची गोळ्या झाडून हत्या केली आणि अन्य १८ बेपत्ता आहे. तृणमूलचा आरोप आहे की त्यांच्या पक्षाचे तीन कार्यकर्ते संदेशखली विधानसभा क्षेत्रातील हाटगाछी येथील हिंसक घटनेत मारले गेले.
शनिवारी रात्री उशिरा भाजपचे नेते मुकुल रॉय यांनी ट्विट करत भाजप कार्यकर्त्यांविरोधातील हिंसेला ममता बॅनर्जी जबाबदार असल्याचा आरोप केला. पोलिसांनी या घटनेत आतापर्यंत भाजपचे २ आणि तृणमूलच्या तीन कार्यकर्त्यांचा मृत्यू झाल्याचे सांगितले. स्थानिक लोकांच्या माहितीनुसार, शनिवार दुपारी भाजपचा झेंडा हटवण्याच्या मुद्द्यावरून दोन्ही पक्षांच्या कार्यकर्त्यांमध्ये वादाला सुरुवात झाली. हा वाद उफाळून नंतर त्याला हिंसक वळण लागले.