मोदींना विरोध करतात म्हणून , अनुराग कश्यप यांच्या मुलीला मोदी समर्थक चौकीदाराची बलात्काराची धमकी , मोदींना ट्विट केले फॉरवर्ड …
‘माझ्या १८ वर्षाच्या मुलीला अश्लाघ्य भाषेत थेट बलात्काराची धमकी देणाऱ्या तुमच्या समर्थकांना कसं तोंड द्यायचं’ असा सवाल दिग्दर्शक-निर्माता अनुराग कश्यप यांनं पंतप्रधान मोदींना केला आहे. धमकी दिलेल्या या मेसेजचा फोटो काढून त्यानं तो सोशल मीडियावर शेअरदेखील केला आहे. लोकसभा निवडणुकीत पंतप्रधान नरेंद्र मोदी आणि भाजपला मिळालेल्या यशानंतर अनेक कलाकारांनी सोशल मीडियावर त्यांना शुभेच्छा दिल्या. मोदींच्या यशाबद्दल दिग्दर्शक अनुराग कश्यपनंदेखील त्यांचं अभिनंदन केलं. परंतु, यावेळी मोदी समर्थकांच्या वागण्यावरून त्यानं पंतप्रधान मोदींना टोलाही लगावला. चौकीदार रामसंघी नावाच्या ट्विटर अकाउंटवरून अनुरागची मुलगी आलिया कश्यप हिला बलात्काराची धमकी देण्यात आली आहे. ‘जय श्रीराम… तुझ्या बापाला त्याचं तोंड बंद ठेवायला सांग. त्यानं असं केलं नाही तर तुझ्यावर बलात्कार करेन’ अशा आशयाचं हे ट्विट आहे.
देशातील राजकीय परिस्थितीवर अनेकदा अनुराग निर्भीडपणे भाष्य करताना दिसतो. अनुरागच्या राजकीय भूमिकेसाठी त्याला अनेकदा ट्रोलही केलं गेलंय. परंतु, वैचारिक मतभेद बाजूला ठेवून अनुरागनं मोदींना विजयाच्या शुभेच्छा दिल्या आहेत. या शुभेच्छा देताना त्यानं मोदी समर्थकाचं ट्विटही शेअर केलं आहे. त्यानं लिहिलंय की, ‘प्रिय, नरेंद्र मोदी सर, तुम्ही मिळवलेल्या विजयासाठी तुमचं अभिनंदन…माझ्या आणि तुमच्यामध्ये असलेल्या वैचारिक मतभेदांमुळे तुमचे समर्थक माझ्या मुलीला बलात्काराच्या धमक्या देत आहेत आणि तुमच्या विजयाचा आनंद साजरा करत आहेत. तुमच्या या अशा समर्थकांशी आम्ही कशाप्रकारे वागावे हे तुम्ही आम्हाला सांगा ही विनंती’ असं ट्विट त्यानं केलं आहे.