Aurangabad Loksabha : एमआयएमकडून औरंगाबादसाठी आ. इम्तियाज जलील यांच्या नावाची घोषणा
एआयएमआयएम पक्षाकडून औरंगाबाद लोकसभेत उमेदवार देण्याचा निर्णय अखेर पक्षप्रमुख खासदार असदुद्दीन ओवेसी यांनी जाहीर केला. लोकसभा निवडणुकीसाठी पक्षाच्या वतीने आमदार इम्तियाज जलील यांच्या उमेदवारीची अधिकृत घोषणा हैदराबाद येथील पक्ष कार्यालयात रात्री उशिरा केली.
गेल्या काही दिवसांपासून एमआयएम पक्षाकडून आमदार इम्तियाज जलील लोकसभा निवडणुकीत उमेदवारी जाहीर करणार किंवा नाही याबाबत चर्चा सुरू होती. अखेर सोमवारी सकाळी दारूस सलाम येथे खासदार असदुद्दीन ओवेसी यांनी औरंगाबादमधील एमआयएम नगरसेवक, आमदार तसेच पदाधिकारी यांची बैठक घेतली. या बैठकीत ओवेसी यांनी नगरसेवक तथा पदाधिकारी यांच्यासोबत औरंगाबाद लोकसभेबाबत माहिती घेतली. निवडणूक जिकंण्यासाठी कशी रणनिती ठरविण्यात आली आहे, याचीही माहिती खासदार ओवेसी यांनी घेतली. ही बैठक साधारणत: एक तास चालली. या बैठकीत जलील यांच्या उमेदवारीवर शिक्कामोर्तब करण्यात आले.