‘आम्हाला तुझा अभिमान आहे…’ ‘ग्रेट जॉब_जय श्रीराम’च्या मेसेजेसनंतर जामिया मिलिया इस्लामियात गोळीबार करणारा रामभक्त गोपालचे फेसबुक खाते अखेर बंद
देशभर चर्चेत आलेला जामिया मिलिया इस्लामियात गोळीबार करणारा रामभक्त गोपाल याचे फेसबुक अकांउंट बंद करण्यात आले आहे. माध्यमांनी दिलेल्या वृत्तानुसार फेसबुकने गोपलचं अकाउंट सायंकाळी ५.३० वाजता बंद करण्यात आलं. रामभक्त गोपालची फेसबुक टाइमलाइन उजव्या विचारसरणीच्या कार्यकर्त्यांच्या मेसेज, प्रतिक्रियांनी भरून गेली होती. त्याचं अभिनंदन करणारे मेसेज त्याच्या फेसबुक लाइव्ह व्हिडिओवर पडत होते. समाजविघातक गोष्टींना आळा आणण्याच्या उद्दिष्टाने त्याचं अकाउंट बंद करण्यात आलं. मात्र, तत्पूर्वी नागरिकांनी तसेच इंटरनेट यूजर्सनी हा चिथावणीखोर मजकूर असल्याचे फेसबुकला सातत्याने टॅग करूनदेखील फेसबुकने हे व्हिडिओ आणि कमेंट्स सुमारे तीन तास हटवले नव्हते. गोपलच्या टाइमलाइनवर ‘आम्हाला तुझा अभिमान आहे…’ ‘ग्रेट जॉब_जय श्रीराम’, ‘जय श्रीराम देके रहेंगे आझादी.’ अशा मेसेजचा पाऊस पडला होता.
नागरिकत्व कायदा (सीएए) आणि राष्ट्रीय नागरिकत्व नोंदणी (एनआरसी) विरोधात जामिया मिलिया इस्लामिया विद्यापीठातील विद्यार्थ्यांनी मोर्चा काढला होता. या मोर्चावर दुपारच्या सुमारास रामभक्त गोपाल याने गोळीबार गेला. यामध्ये एक विद्यार्थी जखमी झाला. गोळीबार करणाऱ्या रामभक्त गोपालने हा गोळीबार करण्याआधी काही फेसबुक पोस्ट केल्या होत्या.या गोळीबाराच्या आधी २ वाजता त्याने एक व्हिडिओ शेअर केला होता. त्यावरही फेसबुक यूजर्सनी त्याला समर्थन देणारे मेसेज केले होते. ‘फुल सपोर्ट’, ‘ग्रेट बॉय’ असे मेसेज त्याच्या टाइमलाइनवर पडले होते. सायंकाळी ५ वाजता त्याच्या अकाउंटवर शेवटचं फेसबुक लाइव्ह व्हिडिओ पडला होता. त्याने गोळीबार करण्याच्या काही क्षणांपूर्वीचा हा व्हिडिओ होता. त्यावर २,६०० प्रतिक्रिया, ७६३ शेअर्स आणि ६५ हजार व्ह्यूज होते. विशेष म्हणजे, रामभक्त गोपाल याला सोशल माडियावर मोठ्या प्रमाणावर फॉलोइंग आहे. त्याच्या फ्रेंडलिस्टवर ३,६२३ फ्रेंड्स आहेत. त्याच्या फेसबुक लाइव्ह व्हिडिओआधी रामभक्त गोपाल याने ‘शाहीन पार्ट… गेम ओव्हर’ अशी पोस्ट लिहीली होती.