माजी अर्थमंत्री चिदंबरमसह १४ जणांविरुद्ध विशेष न्यायालयात आरोपपत्र
माजी अर्थमंत्री पी. चिदंबरम, त्यांचे पुत्र कार्ती चिदंबरम तसेच पीटर मुखर्जी, इंद्राणी मुखर्जी यांच्यासह १४ जणांविरुद्ध आज दिल्लीतील विशेष न्यायालयात आरोपपत्र दाखल केले. याप्रकरणी पुढील सुनावणी २१ ऑक्टोबर रोजी होणार आहे. आयएनएक्स मीडिया प्रकरणी केंद्रीय गुन्हे अन्वेषण विभागाने (सीबीआय) त्यांच्याविरुद्ध कारवाई सुरु केली आहे.
आयएनएक्स मीडियाप्रकरणी सीबीआयने विशेष न्यायाधीश लालसिंग यांच्यापुढे आरोपपत्र दाखल केले. यात आयएनएक्स मीडिया, एएससीएल अँड चेस मॅनेजमेंट सर्व्हिसेससह एस. भास्करमण, निती आयोगाच्या माजी मुख्य कार्यकारी अधिकारी सिंधुश्री खुल्लर, सूक्ष्म, लघु व मध्यम उद्योग मंत्रालयाचे माजी सचिव अनुप के. पुजारी, प्रबोध सक्सेना, रविंद्र प्रसाद यांच्यावरही आरोप ठेवण्यात आले आहेत.
पी. चिदंबरम यांच्याविरुद्ध जबाब देणारी केवळ इंद्राणी मुखर्जीच नाही तर अन्य एक साक्षीदार असल्याची माहिती आज सॉलिसिटर जनरल तुषार मेहता यांनी न्यायालयात दिली. ही नवी माहिती पुढे आली असल्याने चिदंबरम यांच्या अडचणींत आणखीच भर पडली आहे. दरम्यान, दिल्लीतील राउज एव्हेन्यू कोर्टाने चिदंबरम यांच्या कोठडीत २४ ऑक्टोबरपर्यंत वाढ केली आहे. चिदंबरम सध्या अंमलबजावणी संचालनालयाच्या (ईडी) ताब्यात आहेत. त्यांना आता २४ ऑक्टोबर रोजी कोर्टात हजर करण्यात येणार आहे.
२००७ मध्ये पी. चिदंबरम अर्थमंत्री असताना अर्थमंत्रालयाच्या अखत्यारित असलेल्या परकीय गुंतवणूक प्रोत्साहन मंडळाने आयएनएक्स मीडियाला ३०५ कोटी रुपयांचा परकीय निधी स्वीकारण्यास मंजुरी दिली होती. या मंजुरीत अनियमितता आढळून आल्याने त्या आधारावर १५ मे २०१७ रोजी सीबीआयने याप्रकरणी गुन्हा दाखल केला होता. त्यानंतर दोन महिन्यांपूर्वी २१ ऑगस्ट रोजी चिदंबरम यांना दिल्लीतील जोरबाग येथील निवासस्थानातून सीबीआयने अटक केली होती. सीबीआयच्या ताब्यात असतानाच चिदंबरम यांना ईडीने अटक केली असून सध्या ईडीकडून त्यांची चौकशी सुरू आहे. दुसरीकडे दिल्ली हायकोर्टाने जामीन नाकारल्यानंतर त्याला चिदंबरम यांनी सुप्रीम कोर्टात आव्हान दिले असून त्यावर कोर्टाने निर्णय राखून ठेवला आहे.