Crime News : “तुम्ही माझ्याविषयी काय बोलताय ?” असे विचारात उद्योजक फिरोदिया यांच्यावर त्यांच्या पत्नीचा चाकू हल्ला
मुंबईतील प्रसिद्ध उद्योजक कायनेटिक मोटोरॉयलचे व्यवस्थापकीय संचालक अंजिक्य फिरोदिया यांच्यावर त्यांच्या पत्नीने जीवघेणा हल्ला केला आहे. मंगळवारी साडे सातच्या सुमारास ही घटना घडली आहे. स्वयंपाक घरातील चाकूने केलेल्या हल्ल्यात अंजिक्य यांच्या डोळ्याला आणि नाकाला दुखापत झाली आहे. अजिंक्य यांच्या तक्रारीवरून चतुरश्रींगी पोलीस स्टेशनमध्ये पत्नीविरोधात गुन्हा दाखल करण्यात आला आहे.
पोलिसांनी दिलेल्या माहितीनुसार अजिंक्य फिरोदिया (वय ४०) हे आपल्या दोन मुलांसोबत तसेच आई (जयश्री) व वडील (अरुण) यांच्यासोबत जेवण करीत होते. त्याचवेळी त्यांची पत्नी अपर्णा ही तेथून जात असताना तुम्ही माझ्याबद्दल काय बोलत आहात?, माझ्याबद्दल तुम्ही का बोललात?, मला माहिती आहे तुम्ही माझ्याबद्दल काय बोलत आहात?, असे म्हणत फोन जोरात खाली आदळला. त्यानंतर अपर्णाने अजिंक्यसोबत वाद घालायला सुरुवात केली. अपर्णा इतक्यावरच थांबली नाही तर तिनं अजिंक्य यांचे शर्ट फाडले. त्यानंतर किचनमध्ये जाऊन सुरी (चाकू) घेऊन आली. व अजिंक्य यांच्यावर हल्ला केला. या हल्ल्यात अजिंक्य यांच्या उजव्या डोळ्याखाली आणि नाकाला किरकोळ दुखापत झाली. हा सर्व प्रकार अजिंक्य यांच्या आई-वडीलांसमोर घडला.
अजिंक्य फिरोदिया यांच्या तक्रारीवरून अपर्णा फिरोदिया विरोधात कलम ३२४, ३२३, ३१५, ४४७ अंतर्गत गुन्हा दाखल करण्यात आल्याची माहिती चतुरश्रृंगी पोलीस स्टेशनचे वरिष्ठ पोलीस निरीक्षक अनिल शेवाळे यांनी ‘मुंबई मिरर’शी बोलताना दिली. तर अजिंक्य यांच्यावर औंढ येथील हॉस्पिटलमध्ये उपचार करण्यात आला असून अजिंक्य यांनी या प्रकरणावर कोणतेही भाष्य करण्यास नकार दिला आहे.