Big Boss : अभिजित बिचकुलेला धनादेश अनादर प्रकरणी जमीन मात्र खंडणीच्या गुन्ह्यात न्यायालयीन कोठडी

बिग बॉसच्या घरातील स्पर्धक अभिजीत बिचुकले याला २०१२ मधील खंडणी प्रकरणात न्यायालयीन कोठडी सुनावण्यात आली असून २०१२ च्या चेक बाऊन्सप्रकरणी मात्र त्याचा जामीन मंजूर झाला आहे. सोमवारी या प्रकरणी पुढील सुनावणी होणार आहे.

अभिजीत बिचुकले याला सातारा पोलिसांनी जुन्या चेक बाऊन्सप्रकरणी शुक्रवारी बिग बॉसच्या घरातून अटक केली होती. बिचुकले याला सातारा येथे न्यायालयात हजर केल्यावर चेक बाऊन्स प्रकरणासोबत २०१२ सालचे खंडणी प्रकरणावरही सुनावणी झाली. या सुनावणीमध्ये चेक बाऊन्स प्रकरणात बिचुकलेला जामीन मंजूर झाला मात्र, खंडणी प्रकरणी त्याला न्यायालयीन कोठडी सुनावण्यात आली. या सगळ्या प्रकरणाबाबत कोणतीही सविस्तर प्रतिक्रिया द्यायला बिचुकलेने नकार दिलाय परंतु, हे माझ्याविरोधातलं राजकीय षडयंत्र आहे असा आरोप मात्र त्याने केला आहे. दरम्यान, बिचुकले घरातून बाहेर पडणार की बिग बॉसच्या घरात पुन्हा एन्ट्री घेणार हे अद्याप गुलदस्त्यात आहे. चॅनलकडून याबाबत कोणतीही अधिकृत घोषणा करण्यात आलेली नाही.