मायावती यांचे अधिकृत ट्विटर अकाउंट कोणते ?
मायावती ‘या’ एकाच अकाउंटला फॉलो करतात!
बहुजन समाज पार्टी (बसपा) च्या राष्ट्रीय अध्यक्षा मायावती यांनी आपले ट्विटर अकाउंट सुरू केले आहे. अवघ्या चार दिवसात ७४ हजार लोकांनी त्यांच्या ट्विटर हँडलला फॉलो केले आहे. परंतु, मायावती या केवळ एकाच ट्विटर हँडलला फोलो करीत असल्याचे स्पष्ट झाले आहे.
६ फेब्रुवारी रोजी मायावती यांनी ट्विटरवर येण्याची अधिकृत घोषणा केली होती. मायावती यांचे @SushriMayawati हे निळ्या रंगात दिसणारे अधिकृत ट्विटर अकाउंट आहे. सोशल मीडियापासून चार हात लांब राहणाऱ्या मायावती यांनी अखेर ट्विटरवर आपले अकाउंट सुरू केले आहे. मायावती यांना चार दिवसात ७४ हजारांहून अधिक लोकांनी फॉलो केले आहे. मायावती या ज्या ट्विटर हँडलला फॉलो करतात ते ट्विटर हँडल ट्विटर सपोर्टचे आहे. मायावती यांनी आतापर्यंत १७ ट्विटही केले आहेत.
मायावती यांनी मुख्यमंत्रीपदाच्या काळात स्मारकं आणि पुतळे उभारण्यावर खर्च केलेले जनतेचे सर्व पैसे परत करावेत, असे निर्देश सुप्रीम कोर्टाने दिल्यानंतर सोशल मीडियावर चुकीच्या पद्धतीने या निर्णयासंबंधी सांगितले जात असल्याचे मायावती यांनी आपल्या ट्विटमध्ये म्हटले आहे. शनिवारी ट्विट करून त्यांनी मीडियाला आवाहन केले आहे. मीडियांनी कृपया सुप्रीम कोर्टाच्या निर्णयाची अर्धवट माहिती देवू नये. कोर्टात आम्ही आमची बाजू मांडणार आहोत. आम्हाला विश्वास आहे की, सुप्रीम कोर्टाकडून न्याय मिळेल, असे मायावती यांनी आपल्या ट्विटमध्ये म्हटंलय.