RailwayAccidentNewsUpdate : बालासोरमध्ये बचावकार्य सुरूच, मृतांची संख्या 237 तर 900 प्रवासी रुग्णालयात

बालासोर : ओडिशाचे मुख्य सचिव प्रदीप जेना यांनी सांगितले की, आतापर्यंत 900 लोक जखमी झाले आहेत, त्यांच्यावर उपचार सुरू आहेत. 233जणांचे मृतदेह बाहेर काढण्यात आले आहेत. एनडीआरएफ, ओडीआरएएफ आणि अग्निशमन विभागाचे पथक घटनास्थळी हजर आहेत. ओडिशातील बालासोरमध्ये 2 जून रोजी संध्याकाळी 7.30 च्या सुमारास 3 गाड्यांचा अपघात झाला. गेल्या 12 तासांपासून बचावकार्य सुरू आहे. या भीषण रेल्वे अपघातामागील कारण अद्याप स्पष्ट झालेले नाही. यासाठी चौकशी समिती स्थापन करण्यात आली आहे, अशी माहिती रेल्वेमंत्र्यांनी दिली.

भीषण रेल्वेअपघातानंतर अनेक गाड्या रद्द करण्यात आल्या आहेत. काही गाड्यांचे मार्ग वळवण्यात आले आहेत. या अपघातात आतापर्यंत २३३ प्रवाशांचा मृत्यू झाला आहे. तर ९०० हून अधिक जखमी झाले आहेत. बालासोर जिल्ह्यातील बहानगर येथे बेंगळुरू-हावडा सुपरफास्ट एक्स्प्रेस, कोरोमंडल एक्स्प्रेस आणि मालगाडी तीन वेगवेगळ्या रुळांवर आदळल्याची घटना सायंकाळी उशिरा घडली. या अपघातानंतर अनेक गाड्या रद्द करण्यात आल्या तर काही मार्ग बदलण्यात आले आहेत.

ओडिशा रेल्वेअपघातानंतर अद्यापही बचावकार्य सुरू आहे. बचाव आणि मदत कार्यात अनेक जखमींना कटक, भुवनेश्वर आणि बालासोर येथील रुग्णालयात हलविण्यात येत आहे. अपघातातील मृतांच्या कुटुंबीयांना पंतप्रधानांकडून दोन लाख रुपये, तर रेल्वे मंत्रालयाकडून 10 लाख रुपये देण्याची घोषणा करण्यात आली आहे.

मृतांच्या कुटुंबीयांना रेल्वे मंत्रालय देणार 10 लाख

ओडिशात झालेल्या या भीषण या अपघातातील मृतांच्या नातलगांना प्रत्येकी 10 लाख रुपयांची आर्थिक मदत दिली जाणार आहे. याचबरोबर या अपघातात गंभीर जखमी झालेल्यांना दोन लाख रुपयांची तर किरकोळ जखमी झालेल्यांना 50,000 रुपयांची मदत दिली जाईल.”

पीएमओनेही जारी केली मदत

दरम्यान पीएम मोदींनी ओडिशा रेल्वे अपघातातील मृतांना 2 लाख रुपये, तर जखमींना 50 हजार रुपयांची मदत जाहीर केली आहे. पीएमओने ट्विट करून यासंदर्भात माहिती दिली. “ओडिशा ट्रेन अपघातात मृत्यू पावलेल्या प्रत्येक व्यक्तीच्या नातलगांना पीएमएनआरएफकडून 2 लाख रुपयांची मदत केली जाईल. तसेच जखमींना रुपयांची मप्रत्येकी 50 हजार दत करण्यात येईल,” असे या ट्विटमध्ये म्हणण्यात आले आहे.

पंतप्रधान, राष्ट्रपतींना तीव्र दु:ख

कोरोमंडल एक्स्प्रेस व मालगाडीच्या भीषण अपघातात झालेल्या प्राणहानीबद्दल राष्ट्रपती द्रौपदी मुर्मू आणि पंतप्रधान नरेंद्र मोदी यांनी तीव्र दु:ख व्यक्त केले आहे. अपघातग्रस्तांना सर्वतोपरी मदत करण्याचे आदेश पंतप्रधान मोदी यांनी रेल्वेमंत्री अश्विनी वैष्णव यांना दिले आहेत. दरम्यान बालासोर येथे झालेल्या रेल्वे दुर्घटनेनंतर शुक्रवारी (दि. ३ जून) होणारा मुंबई-गोवा वंदे भारत ट्रेनचा गोवा राज्यातील मडगाव येथे होणारा लोकार्पण सोहळा रद्द करण्यात आला आहे.

जखमींवर सर्वोत्तम उपचार : रेल्वे मंत्री

केंद्रीय रेल्वे मंत्री अश्विनी वैष्णव म्हणाले, “ही खूप मोठी घटना आहे, आमच्या प्रार्थना सर्व दिवंगत आत्म्यांसोबत आहेत, आमच्या सर्व विभागातील टीम्स हजर आहेत. सगळीकडून जम बसवला आहे, माझ्या प्रार्थना त्या सर्व कुटुंबांसोबत आहेत ज्यांच्या कुटुंबीयांना आरोग्य उपचार मिळतील. जिथे उत्तम सुविधा आहे तिथे करा.उच्चस्तरीय समितीनेही निर्णय घेतला आहे, या दुर्घटनेच्या मर्यादेपर्यंत जाऊन संपूर्ण घटना समजून घेतली जाईल. सध्या सर्व लक्ष बचावावर आहे. ही एक प्रकारची घटना आहे, आपण मानवी संवेदनशीलता ठेवावी, जीर्णोद्धाराचे काम त्वरित सुरू होईल.

विरोधकांच्या प्रतिक्रिया

ओडिशातील बालासोर येथे झालेल्या भीषण रेल्वे अपघाताबाबत राजकीय प्रतिक्रियाही येऊ लागल्या आहेत. या क्रमवारीत पश्चिम बंगालमधील सत्ताधारी पक्ष तृणमूल काँग्रेसने (टीएमसी) या तिहेरी रेल्वे अपघाताबाबत रेल्वेमंत्री अश्विनी वैष्णव यांच्या राजीनाम्याची मागणी केली आहे. टीएमसीचे राष्ट्रीय सरचिटणीस अभिषेक बॅनर्जी यांनी आरोप केला आहे की अशा ट्रेन अपघातांना रोखण्यासाठी टक्करविरोधी उपकरणे बसवण्याऐवजी केंद्र सरकार विरोधी नेत्यांची हेरगिरी करण्यासाठी सॉफ्टवेअरवर करोडो रुपये खर्च करत आहे. पंतप्रधान मोदींच्या नेतृत्वाखालील सरकार केवळ बढाया मारते, असेही ते म्हणाले.

‘गाड्यांच्या सुरक्षेसाठी काहीच केले नाही’

टीएमसी नेते म्हणाले, “केंद्रातील नरेंद्र मोदी सरकार जनतेची दिशाभूल करून राजकीय समर्थन मिळविण्यासाठी वंदे भारत आणि नव्याने बांधलेल्या स्थानकांवर बढाई मारत आहे, परंतु सुरक्षा उपायांसाठी काहीही करत नाही.” फेसबुकवर लिहिताना ते म्हणाले, “केंद्राच्या उदासिनतेचा फटका गरीब आणि उपेक्षितांना सहन करावा लागतो, मग ते नोटाबंदी, जीएसटी, लॉकडाऊन, कृषी कायदा किंवा रेल्वे असो. पीडितांच्या कुटुंबीयांप्रती शोक व्यक्त करताना ते पुढे म्हणाले, “ज्यांनी आपले प्रियजन गमावले आहेत अशा कुटुंबांप्रती माझ्या शोक संवेदना आणि जखमींनी लवकरात लवकर बरे व्हावे यासाठी प्रार्थना.

भाजपनेही दिले प्रत्युत्तर

दरम्यान भाजपने टीएमसी नेत्यावर या दुःखद अपघाताचे राजकारण करण्याचा प्रयत्न केल्याचा आरोप केला आहे. पश्चिम बंगालमधील भाजपचे प्रवक्ते समिक भट्टाचार्य म्हणाले, “ममता बॅनर्जी रेल्वेमंत्री असतानाही रेल्वे अपघात झाले होते. त्यांनी राजीनामा दिला का? उत्तर नाही आहे. या दुर्घटनेवर टीएमसीने राजकारण करू नये.

आतापार्यंतचे मोठे अपघात

1. या सगळ्यात एवढा मोठा अपघात होण्याची ही पहिलीच वेळ नाही. तत्पूर्वी, 13 जानेवारी 2022 रोजी पश्चिम बंगालमधील अलीपुरद्वार येथे बिकानेर-गुवाहाटी एक्स्प्रेसचे किमान 12 डबे रुळावरून घसरले होते, त्यात 9 जण ठार आणि 36 जण जखमी झाले होते. दुसरीकडे, 2018 मध्ये ऑक्टोबर महिन्यात रावण दहनाच्या निमित्ताने पंजाबच्या अमृतसरमध्ये भीषण रेल्वे अपघात झाला होता, ज्यामध्ये 61 जणांचा मृत्यू झाला होता.

2. 23 ऑगस्ट 2017 रोजी, उत्तर प्रदेशातील औरैयाजवळ दिल्ली-जाणाऱ्या कैफियत एक्स्प्रेसचे नऊ डबे रुळावरून घसरले, यात किमान 70 लोक जखमी झाले.

3. 19 ऑगस्ट 2017 रोजी हरिद्वार आणि पुरी दरम्यान धावणाऱ्या कलिंग उत्कल एक्सप्रेसला उत्तर प्रदेशातील खतौलीजवळ अपघात झाला. ट्रेनच्या 14 बोगी रुळावरून घसरल्या, त्यात 21 प्रवाशांचा मृत्यू झाला, तर 97 जण जखमी झाले.

4. 2016 मध्ये इंदूर-पाटणा एक्स्प्रेस कानपूरमधील पुखरायनजवळ रुळावरून घसरली होती. ज्यामध्ये किमान 150 लोकांचा मृत्यू झाला.

5. 20 मार्च 2015 रोजी डेहराडूनहून वाराणसीला जाणाऱ्या जनता एक्स्प्रेसमध्ये मोठा अपघात झाला होता. उत्तर प्रदेशातील रायबरेली येथील बछरावन रेल्वे स्थानकाजवळ रेल्वेचे इंजिन आणि त्याच्याशी जोडलेल्या दोन बोगी रुळावरून घसरल्याने ३० हून अधिक लोकांचा मृत्यू झाला असून सुमारे १५० जण जखमी झाले आहेत.

6. 26 मे 2014 रोजी गोरखपूरच्या दिशेने जाणारी गोरखधाम एक्स्प्रेस उत्तर प्रदेशातील संत कबीर नगर भागातील खलीलाबाद स्टेशनजवळ थांबलेल्या मालगाडीला धडकली, यात 25 जण ठार आणि 50 हून अधिक जखमी झाले.

7. 30 जुलै 2012 रोजी दिल्ली-चेन्नई तामिळनाडू एक्स्प्रेसच्या डब्याला नेल्लोरजवळ आग लागली आणि 30 हून अधिक लोकांचा मृत्यू झाला.

8. यापूर्वी 22 मे 2012 रोजी हुबळी-बंगलोर हम्पी एक्स्प्रेस आंध्र प्रदेशजवळ मालगाडीला धडकली होती. यामध्ये 25 प्रवाशांचा मृत्यू झाला असून 43 जण जखमी झाले आहेत.

9. 2012 हे वर्ष भारतीय रेल्वेच्या इतिहासातील रेल्वे अपघातांच्या दृष्टीने सर्वात वाईट वर्ष मानले गेले. या वर्षी सुमारे 14 अपघातांची नोंद झाली, ज्यात ट्रेन रुळावरून घसरणे आणि समोरासमोर धडकणे या दोन्ही घटनांचा समावेश आहे.

10. 7 जुलै 2011 रोजी उत्तर प्रदेशातील एटा जिल्ह्याजवळ छपरा-मथुरा एक्स्प्रेसची बसला धडक झाली. या घटनेत 69 जणांना आपला जीव गमवावा लागला असून अनेक जण गंभीर जखमी झाले आहेत. रात्री उशिरा मानवरहित क्रॉसिंगवर हा अपघात झाला. ट्रेन भरधाव वेगाने जात होती आणि बस अर्धा किलोमीटरपर्यंत ओढत राहिली.