IndiaNewsUpdate : भारत जगातील पाचवी सर्वात मोठी अर्थव्यवस्था, राष्ट्रपती द्रौपदी मुर्मू यांचे देशाला संबोधन …
नवी दिल्ली : ७४व्या प्रजासत्ताक दिनाच्या पूर्वसंध्येला राष्ट्रपती द्रौपदी मुर्मू यांनी देशाला संबोधित केले . या निमित्ताने त्यांचे हे पहिलेच भाषण आहे. त्या म्हणाल्या की, ७४ व्या प्रजासत्ताक दिनाच्या पूर्वसंध्येला मी देशात आणि परदेशात राहणाऱ्या सर्व भारतीय जनतेचे मनःपूर्वक अभिनंदन करते. जेव्हा आपण प्रजासत्ताक दिन साजरा करतो, तेव्हा आपण एक राष्ट्र म्हणून एकत्रितपणे केलेल्या कामगिरीचा उत्सव साजरा करतो.
राष्ट्रपती द्रौपदी मुर्मू म्हणाल्या की, आपल्या गौरव गाथेचा प्रत्येक नागरिकाला अभिमान आहे. आपण सर्व एक आहोत, आणि आपण सर्व भारतीय आहोत. कितीतरी पंथांनी आणि कितीतरी भाषांनी आपल्याला विभागले नाही तर एकत्र केले आहे. त्यामुळेच आपण लोकशाही प्रजासत्ताक म्हणून यशस्वी झालो आहोत. गरीब आणि निरक्षर राष्ट्राच्या स्थितीतून पुढे जात भारताने जागतिक पटलावर आत्मविश्वासपूर्ण राष्ट्राच्या स्थानी आले आहे.
राष्ट्रपती पुढे म्हणाल्या कि, राज्यघटनेच्या रचनाकारांच्या सामूहिक बुद्धीच्या मार्गदर्शनाशिवाय ही प्रगती शक्यच नव्हती. डॉ. बी.आर. आंबेडकर यांचा भारत सदैव ऋणी राहील, ज्यांनी राज्यघटनेच्या मसुदा समितीचे नेतृत्व केले आणि अशा प्रकारे राज्यघटना पूर्ण करण्यात महत्त्वाची भूमिका बजावली. सुरुवातीचा मसुदा तयार करणारे कायदेतज्ज्ञ बीएन राव आणि राज्यघटना तयार करण्यात मदत करणारे इतर तज्ज्ञ अधिकारी यांची भूमिकाही आपण लक्षात ठेवली पाहिजे. आम्हाला अभिमान आहे की त्या घटनासमितीच्या सदस्यांनी भारतातील सर्व प्रदेशांचे आणि समुदायांचे प्रतिनिधित्व केले आणि त्यात १५ महिलांचा समावेश होता.
जगातील पाचवी सर्वात मोठी अर्थव्यवस्था
भारत गेल्या वर्षी जगातील पाचवी सर्वात मोठी अर्थव्यवस्था बनला आहे. हे यश आर्थिक अनिश्चिततेच्या जागतिक पार्श्वभूमीवर प्राप्त झाले आहे. सक्षम नेतृत्व आणि प्रभावी संघर्षाच्या बळावर आपण लवकरच मंदीतून बाहेर आलो आणि आपला विकासाचा प्रवास पुन्हा सुरू केला सरकारच्या वेळीच आणि सक्रिय हस्तक्षेपामुळे हे शक्य झाले आहे. ‘आत्मनिर्भर भारत’ या उपक्रमाला लोकांचा मोठा प्रतिसाद मिळाला आहे.
महिला सक्षमीकरण आणि स्त्री-पुरुष समानता या आता केवळ घोषणा नाहीत. उद्याचा भारत घडवण्यात स्त्रिया जास्तीत जास्त योगदान देतील यात माझ्या मनात शंका नाही. सक्षमीकरणाची ही दृष्टी अनुसूचित जाती आणि अनुसूचित जमातींसह लोकांच्या दुर्बल घटकांसाठी सरकारच्या कार्याचे मार्गदर्शन करते. खरे तर आमचे उद्दिष्ट केवळ त्या लोकांच्या जीवनातील अडथळे दूर करणे आणि त्यांच्या विकासात मदत करणे हे नाही तर त्या समुदायांकडून शिकणे देखील आहे.
चांगले जग निर्माण करण्यात योगदान
आदिवासी समाजातील लोक पर्यावरणाच्या रक्षणापासून समाजाला अधिक एकसंध बनवण्यापर्यंत अनेक क्षेत्रात खूप काही शिकवू शकतात. यावर्षी भारत G-२० देशांच्या गटाचे अध्यक्षपद भूषवत आहे. आपल्या वैश्विक बंधुत्वाच्या आदर्शाच्या अनुषंगाने, आम्ही सर्वांसाठी शांतता आणि समृद्धीसाठी उभे आहोत. G-20 चे अध्यक्षपद भारताला एक चांगले जग निर्माण करण्यात योगदान देण्यासाठी अतिशय महत्त्वाची भूमिका देते.
यावर्षी, इजिप्तचे राष्ट्राध्यक्ष अब्देल फताह अल-सिसी प्रजासत्ताक दिनाच्या सोहळ्याचे प्रमुख पाहुणे असतील. त्यांच्यासोबत पाच मंत्री आणि वरिष्ठ अधिकाऱ्यांसह एक उच्चस्तरीय शिष्टमंडळही येणार आहे. भारत आणि इजिप्त या वर्षी राजनैतिक संबंधांच्या स्थापनेची ७५वर्षे साजरी करत आहेत. भारताच्या G20 अध्यक्षपदाच्या काळात इजिप्तलाही ‘अतिथी देश’ म्हणून आमंत्रित करण्यात आले आहे.
प्रजासत्ताक दिनाच्या समारंभात पारंपारिक मार्चपास्ट होईल, ज्यामध्ये सशस्त्र दल आणि निमलष्करी दलाच्या तुकड्यांद्वारे भव्य परेड केली जाईल. राष्ट्रीय राजधानीत प्रजासत्ताक दिनापूर्वी कोणतीही अनुचित घटना घडू नये यासाठी कडेकोट सुरक्षा व्यवस्था ठेवण्यात आली आहे. अधिका-यांनी सांगितल्या नुसार ६,००० सुरक्षा कर्मचारी तैनात केले जाणार असून कार्यक्रमास उपस्थित राहणाऱ्यांसाठी एकूण २४ हेल्प डेस्क उभारल्या जाणार आहेत.