IndiaNewsUpdate : द्रौपदी मुर्मू यांच्या बाजूने मोठ्या प्रमाणात क्रॉस वोटिंग , जाणून घ्या मतांचे आकडे …
नवी दिल्ली : द्रौपदी मुर्मू देशाच्या १५व्या राष्ट्रपती बनल्या आहेत. त्यांना एकूण 64.03 टक्के मते मिळाली आहेत. त्यांच्या बाजूने जबरदस्त क्रॉस व्होटिंग झाल्याचे वृत्त आहे. भाजप नेत्यांच्या म्हणण्यानुसार 17 विरोधी खासदारांनी क्रॉस व्होटिंग केले आहे. तर शंभरहून अधिक विरोधी आमदारांनीही मुर्मूच्या बाजूने मतदान केल्याचा दावा भाजप नेत्यांनी केला आहे. सर्वाधिक क्रॉस व्होटिंग आसाममध्ये झाले. आसामचे मुख्यमंत्री हिमंता बिस्वा सरमा म्हणाले की, राज्यात एनडीएचे 79 आमदार आहेत. तर मुर्मू यांना 104 मते मिळाली. म्हणजेच तेथे विरोधी पक्षाच्या 25 आमदारांनी मुर्मू यांना मतदान केले आहे.
आसाममध्ये एकूण आमदारांची संख्या 126आहे. त्यापैकी 124 आमदारांनी या निवडणुकीत मतदान केले तर दोन आमदारांनी कोणत्याही कारणास्तव मतदान केले नाही. आसाममध्ये भाजप आणि मित्रपक्षांच्या आमदारांची संख्या 79 आहे. पण द्रौपदी मुर्मूच्या बाजूने 104 मते पडली, म्हणजेच 25 आमदारांनी मुर्मूच्या बाजूने क्रॉस व्होट केले.
क्रॉस वोटिंगमध्ये मध्य प्रदेश दुसऱ्या क्रमांकावर आहे. तेथे मुर्मू यांना आणखी 16 मते मिळाली. मध्य प्रदेशात भाजपचे 130 आणि काँग्रेसचे 96 आमदार आहेत. तिथे द्रौपदी मुर्मू यांना 146 आणि यशवंत सिन्हा यांना 79 मते मिळाली. म्हणजेच 16 आमदारांनी क्रॉस व्होट केले. अशा परिस्थितीत मध्य प्रदेशातही द्रौपदी मुर्मूच्या बाजूने जबरदस्त क्रॉस व्होटिंग झाल्याचे स्पष्ट झाले आहे. मध्य प्रदेशचे मुख्यमंत्री शिवराज सिंह चौहान यांनी क्रॉस व्होटिंग केल्याबद्दल आमदारांचे आभार मानले आहेत.
यशवंत सिन्हा यांना तीन राज्यातून एकही मत नाही…
दरम्यान एनडीएच्या उमेदवार द्रौपदी मुर्मू यांना प्रत्येक राज्यातून मते मिळाली तर यशवंत सिन्हा यांना आंध्र प्रदेश, नागालँड आणि सिक्कीममधून एकही मत मिळाले नाही. पश्चिम बंगालमध्ये भाजपचे 77 आमदार होते त्यापैकी आठ टीएमसीकडे गेले. उर्वरित 69 आमदारांना निवडणुकीपूर्वी हॉटेलमध्ये बंद करून मतदान करण्याचे प्रशिक्षण भाजपने दिले होते. तिथे द्रौपदी मुर्मूला 71 आमदारांनी पाठिंबा दिला होता. म्हणजेच दोन मते जादा मिळाली.
काँग्रेस आमदारांचेही मुर्मू यांना मतदान
यशवंत सिन्हा यांना त्यांच्या गृहराज्य झारखंडमध्ये 81 पैकी केवळ 9 आमदारांची मते मिळाली. तेथे मोठ्या संख्येने काँग्रेस आमदारांनी मुर्मू यांना मतदान केले. तर द्रौपदी मुर्मू यांना तिच्या मूळ राज्य ओडिशात 147 पैकी 137 आमदारांची मते मिळाली. महाराष्ट्रात एकनाथ शिंदे यांना 164 आमदारांचा विश्वासदर्शक ठराव मिळाला तर द्रौपदी मुर्मू यांना 181 आमदारांची मते मिळाली. शिवसेनेच्या दोन्ही गटांनी त्यांना मतदान केले आणि काही विरोधी पक्षांच्या आमदारांनी क्रॉस व्होटिंग केले.
राज्यनिहाय क्रॉस व्होटिंग असे झाले …
आसाम – 25 , मध्य प्रदेश – 16, महाराष्ट्र – १६, गुजरात – 10, झारखंड – 10, छत्तीसगड – 6, बिहार – 6, मेघालय – 7, गोवा – 4, हिमाचल प्रदेश – 2 , हरियाणा आणि अरुणाचल प्रदेश 1-1