IndiaPoliticalUpdate : राष्ट्रपती पदाच्या नावासाठी विरोधी पक्षांची खलबते , काँग्रेसची माघार , आप , टीआरएस बैठकीत नाही …
नवी दिल्ली : तृणमूल काँग्रेसच्या अध्यक्षा ममता बॅनर्जी आज दुपारी ३ वाजता विरोधी पक्षांच्या नेत्यांसोबत राष्ट्रपतीपदाच्या निवडणुकीत विरोधी पक्षाच्या उमेदवाराच्या नावावर एकमत करण्यासाठी पहिली बैठक घेणार आहेत. विरोधी पक्षनेत्यांची विशेष समिती स्थापन करण्याच्या प्रस्तावावर या बैठकीत चर्चा होऊ शकते. यामध्ये महत्त्वाच्या विरोधी पक्षांचे ८ नेते सहभागी होऊ शकतात. ही समिती येत्या आठवडाभरात संभाव्य उमेदवारांच्या नावांवर चर्चा करून विरोधी पक्षांमध्ये एकवाक्यता निर्माण करण्याचा प्रयत्न करणार असून संभाव्य उमेदवारांच्या नावांवरही चर्चा करणार आहे.
दरम्यान राष्ट्रपती पदाच्या निवडणुकीच्या रिंगणात उतरण्यास राष्ट्रवादी काँग्रेसचे अध्यक्ष शरद पवार यांनी नकार दिला असला तरी, काँग्रेसकडूनही उमेदवार उभा केला जाणार नसल्याचे स्पष्ट झाले आहे. काँग्रेसने पवारांच्या नावाला पाठिंबा देऊन स्वतःहून एक पाऊल मागे घेतले असल्यामुळे २२ विरोधी पक्षांमध्ये संभाव्य उमेदवारासाठी अन्य नावांवर चर्चा केली जात आहे. तृणमूल काँग्रेसच्या सर्वेसर्वा ममता बॅनर्जी तसेच माकपचे महासचिव सीताराम येचुरी, भाकपचे नेते डी. राजा यांनी बुधवारी शरद पवारांची दिल्लीतील निवासस्थानी भेट घेतली. ममता बॅनर्जी आणि पवार यांच्यामध्ये सुमारे दीड तास चर्चा झाली. या तीनही नेत्यांनी पवारांचे मन वळवण्याचा प्रयत्न केला.
चंद्रशेखर राव यांची काँग्रेसवर नाराजी
दुसरीकडे तेलंगणाचे मुख्यमंत्री के. चंद्रशेखर राव टीआरएसच्या बैठकीला उपस्थित राहणार नसल्याचे सांगितले जात आहे. भाजप आणि काँग्रेसपासून समान अंतर राखण्याचा निर्णय त्यांच्या पक्षाने घेतला आहे. टीआरएसच्या आक्षेपानंतरही काँग्रेसला बैठकीला बोलावण्यात आल्याचे कारण त्यामागे देण्यात आले. तेलंगणात काँग्रेस हा प्रमुख विरोधी पक्ष आहे. तेलंगणात नुकत्याच झालेल्या जाहीर सभेत राहुल गांधी यांनी भाजपविरोधात काहीही न बोलता टीआरएस सरकारवर निशाणा साधला होता. तेलंगणात काँग्रेसने टीआरएसच्या विरोधात भाजपशी हातमिळवणी केली आहे. त्यामुळे काँग्रेससोबत कोणतेही व्यासपीठ शेअर करण्याचा प्रश्नच येत नाही.
लोकसभा निवडणुकीपासून ते हुजूराबाद पोटनिवडणुकीपर्यंत काँग्रेस आणि भाजपला जिंकण्यासाठी डिपॉझिटही गमावण्याच्या तयारीत आहे, त्यामुळे अशा पक्षावर विश्वास ठेवण्याचा प्रश्नच उद्भवत नाही, असा आरोपही टीआरएसने केला आहे. टीआरएसने आरोप केला आहे की उमेदवाराची निवड आधीच झाली आहे आणि त्यानंतर बैठक बोलावण्यात आली आहे. बैठका घेणे, एकमत करणे, उमेदवाराला मान्यता देणे आणि बैठकीनंतर नाव जाहीर करणे ही योग्य कार्यपद्धती असते . त्यामुळे टीआरएस या बैठकीत सहभागी होणार नाही. राष्ट्रपतीपदाच्या निवडणुकीत आमचा पक्ष कसा मतदान करणार याबाबत निर्णय आणि घोषणा नंतर केली जाईल.
बिजू जनता दल आणि आपचाही बैठकीत सहभाग नाही…
दरम्यान ओडिशाचे मुख्यमंत्री नवीन पटनायक यांचा बिजू जनता दलही या बैठकीत सहभागी होण्याची शक्यता कमी आहे. आज होणाऱ्या विरोधी पक्षांच्या बैठकीत आम आदमी पक्षही सहभागी होणार नाही. आम आदमी पार्टीच्या सूत्रांनी दिलेल्या माहितीनुसार, ‘राष्ट्रपतीपदाचा उमेदवार घोषित झाल्यानंतरच आप या मुद्द्यावर विचार करेल. यानंतर २० किंवा २१ जून रोजी विरोधी पक्षांच्या नेत्यांची बैठक होऊ शकते, ज्यामध्ये विरोधी पक्षाकडून कोण उमेदवार असेल याचा अंतिम निर्णय घेतला जाईल. राष्ट्रपती निवडणुकीसाठी अर्ज भरण्याची शेवटची तारीख २९ जून आहे. आठवडाभरापूर्वी विरोधी पक्ष आपला उमेदवार निश्चित करतील.
यांच्याही नावाची चर्चा
शरद पवार यांनी डावे नेते सीताराम येचुरी आणि डी राजा यांच्या भेटीदरम्यान काँग्रेस नेते गुलाम नबी आझाद आणि गोपाळ कृष्ण गांधी या नेत्यांच्या नावांवर चर्चा झाली. सूत्रांनी दिलेल्या माहितीनुसार, डाव्या नेत्यांनी गुलाम नबी आझाद यांच्या नावावर आक्षेप घेतला. दरम्यान आपण विरोधी पक्षाचा उमेदवार होण्यास उत्सुक नसल्याचे शरद पवार यांनी डाव्या नेत्यांना स्पष्टपणे सांगितले असले तरी त्यांचे मन वळविण्याचे प्रयत्न करण्यात येत आहेत तर योग्य वेळी भूमिका घेण्याचे राष्ट्रवादी काँग्रेसने म्हटले आहे.