PuneNewsUpdate : डॉ. नरेंद्र दाभोलकर हत्या प्रकरण : पाच आरोपींच्या विरोधात दोषारोप निश्चित, न्यायालयात आज काय झाले ?
पुणे : डॉ. नरेंद्र दाभोलकर हत्या प्रकरणातील पाच आरोपींच्या विरोधात दोषारोप निश्चित करण्यात आले आहेत. आता या प्रकऱणाची पुढील सुनावणी ३० सप्टेंबर रोजी होणार आहे. या दिवशी सरकार व बचाव पक्षातर्फे पुराव्यासंबंधीची कागदपत्रे सादर केली जाणार आहेत. न्यायालयाने आरोपी वीरेंद्रसिंह तावडे, सचिन अंदुरे, शरद कळसकर, विक्रम भावे यांच्याविरुद्ध हत्येचा कट रचला असल्याचे निश्चित केले आहे. आरोपी निश्चित झाल्याने आता आरोपींच्या विरोधात खटला चालवण्यात येणार आहे. डॉ. नरेंद्र दाभोलकर यांच्या हत्येला पाच वर्षे झाल्यानंतर आरोपींना अटक झाली. त्यानंतर आता हत्येच्या आठ वर्षांनंतर आरोपींच्या विरोधात आरोप निश्चित झाले आहेत.
दरम्यान आर्थर रोड जेल आणि हर्सुल जेलमध्ये असलेले आरोपी शरद कळसकर आणि सचिन अंदुरे यांना पुण्यातील येरवडा सेंट्रल जेलमध्ये स्थलांतरित करण्याचेही न्यायालयाने आदेश दिले आहेत. न्यायालयाने पाचही आरोपींच्या विरोधात आयपीसी ३०२, १२० ब, ३४, यूएपीएच्या सेक्शन १६ आणि सेक्शन ३ (२५),२७ (१), २७ (३) अंतर्गत आरोप निश्चित केले आहेत.
अंधश्रद्ध निमूर्लन समितीचे संस्थापक डॉ. नरेंद्र दाभोलकर यांची २० ऑगस्ट २०१३ रोजी पुण्यात हत्या करण्यात आली होती. अंधश्रद्धेविरूद्द जनजागृती करणारे ६७ वर्षीय डॉ.नरेंद्र दाभोळकर यांच्यावर गोळ्या झाडून हत्या करण्यात आली होती. पुण्यातील ओंकारेश्वर मंदिराजवळील शिंदे पुलावरून मॉर्निंग वॉक करत असताना दोन हल्लेखोरांनी गोळ्या घालून त्यांची हत्या केली. त्यानंतर पुणे शहर पोलिसांकडून २०१४ साली हे प्रकरण सीबीआयकडे सोपवण्यात आले होते .
Narendra Dabholkar (in file pic) murder case | Charges framed against 5 accused by Pune court under IPC sec 302 (murder), 120(b), 34 along with sec 16 of UAPA & sec 3(25), 27(1), 27(3) of Arms Act. Framing of charges against accused Sanjeev Punalekar to be done under sec 201 IPC. pic.twitter.com/6IG6tpdMbI
— ANI (@ANI) September 15, 2021
न्यायालयात आज काय झाले ?
अतिरिक्त सत्र न्यायाधीश एस. आर. नावंदर यांच्या न्यायालयापुढे ही सुनावणी झाली. कोरोनाचे कारण सांगून आरोपींनी वकील व नातेवाईकांशी संपर्क साधण्यासाठी आरोप निश्चितीस पुन्हा मुदत देण्याची विनंती न्यायालयाला केली मात्र न्यायालयाने मुदतवाढ देण्यास नकार देत आरोप निश्चिती झाली असून, गुन्हा कबूल आहे की नाही, अशी विचारणा आरोपींना केली. त्यावर आरोपींनी गुन्हा कबूल नसल्याचे न्यायालयाला सांगितले.
या प्रकरणातील आरोपी सचिन अंदुरे, विरेंद्रसिंह तावडे, शरद कळसकर व्हिडीओ कॉन्फरन्सिंगद्वारे सुनावणीसाठी हजर होते, तर आरोपी संजीव पुनाळेकर व विक्रम भावे प्रत्यक्ष उपस्थित होते. सीबीआय तर्फे विशेष सरकारी वकील प्रकाश सूर्यवंशी आणि बचाव पक्षातर्फे वीरेंद्र इचलकरंजीकर यांनी कामकाज पाहिले.
कोणावर काय आरोप आहेत ?
या प्रकरणी केंद्रीय अन्वेषण विभागाने (सीबीआय) दाखल केलेल्या दोषारोपपत्रात आरोपी डॉ. वीरेंद्रसिंह तावडे, सचिन अंदुरे, शरद कळसकर यांच्याविरोधात आरोपींवर कट रचणे, हत्या करणे, बेकायदा हालचाली प्रतिबंधक कायद्यानुसार (यूएपीए) आरोप ठेवण्यात आले आहेत. आरोपी अॅड. संजीव पुनाळेकर आणि विक्रम भावे यांच्यावर पुरावे नष्ट करणे आदी आरोप ठेवण्यात आले आहेत. दरम्यान, व्हिडीओ कॉन्फरन्सिंगमधील अडचणींमुळे औरंगाबाद कारागृहात असलेला सचिन अंदुरे आणि आर्थर रोड कारागृहात असलेला शरद कळसकर या दोघांना पुण्यातील येरवडा कारागृहात हलविण्याचे आदेश न्यायालयाने दिले आहेत.
वकिलांचा युक्तिवाद
बचाव पक्षाच्या वकिलांनी युक्तिवाद करताना सीबीआयने दोन वेगवेगळ्या ठिकाणी केलेल्या हल्लेखोरांच्या दाव्यातील विरोधाभासाचा संदर्भ दिला. सीबीआयने २०१६ मध्ये तावडे याच्याविरोधात आरोपपत्र दाखल केले होते. तर फरार सनातन संस्थेचे सदस्य सारंग अकोलकर आणि विनय पवार हे दाभोलकरांवर हल्ला करणारे आरोपी होते. पण २०१८ मध्ये सीबीआयने अंदुरे आणि कळसरकर यांना अटक केली आणि हल्लेखोर असल्याचं सांगितलं. त्यानंतर सीबीआयने अमोल काळे, अमित दिगवेकर आणि राजेश बंगेरा या तिघांना अटक केली होती. मात्र त्यांच्याविरोधात आरोपपत्र दाखल केलेले नाही. दुसरीकडे २०१७ मध्ये बंगळुरूच्या पत्रकार गौरी लंकेश यांच्या हत्येसाठी कळसकर यांच्या तिघांना आरोपी असल्याचं सांगण्यात आलं आहे. असा युक्तिवाद बचाव पक्षाच्या वकिलांनी केला.
आरोपींच्या अटकेचा घटनाक्रम
सीबीआयने जून २०१६ मध्ये प्रथम सनातचे सदस्य आणि इएनटी सर्जन डॉ. वीरेंद्रसिंह तावडे यांना अटक केली. त्यांच्याविरोधात आरोपपत्र सप्टेंबर २०१६ मध्ये दाखल करण्यात आलं होतं. तसेच हत्येच्या कटातील सूत्रधार असल्याचे सांगितले होते . त्यानंतर सीबीआयने २०१८ मध्ये सनातन संस्थेचे आणखी दोन सदस्य सचिन अंदुरे आणि शरद कळसकर यांना अटक केली. या दोघांविरोधात पुरवणी आरोपपत्र फेब्रुवारी २०१९ मध्ये दाखल करण्यात आले . या दोघांनी गोळ्या झाडल्याचं सीबीआयने आपल्या आरोपपत्रात म्हटले आहे. त्यानंतर मे २०१९ मध्ये सीबीआयने मुंबईतील वकील संजीव पुनाळेकर आणि त्यांचे सहकारी विक्रम भावे यांना अटक केली. हे दोघंही सनातन या संस्थेशी जोडलेले आहेत. त्यांच्याविरोधात नोव्हेंबर २०१९ मध्ये आरोपपत्र दाखल करण्यात आलं. पुनाळेकर आणि भावा यांनी पुरावे नष्ट करण्यात भूमिका बजावली असा आरोप सीबीआयने केला. तावडे, अंदुरे आणि कळसकर न्यायालयीन कोठडीत आहेत. तर पुनाळेकर आणि भावे जामिनावर बाहेर आहेत.