MaharashtraNewsUpdate : मास्क , सॅनिटायझर आणि आरोग्यसुविधांबाबतचा राज्य शासनाचा मोठा निर्णय
राज्य सरकारने कोरोनाच्या निमित्ताने ग्राहकांची लूट थांबविण्यासाठी मोठा निर्णय घेतला आहे . कोरोनाची साथ आटोक्यात आणण्यासाठी राज्यात आता एन ९५ मास्क १९ ते ४९ रुपयांपर्यंत तर दोन आणि तीन पदरी मास्क ३ ते ४ रुपयांना मिळणार आहे. आरोग्यमंत्री राजेश टोपे यांनी याबाबतची माहिती दिली. विविध दर्जाच्या मास्कची विहित केलेली विक्री मूल्य मर्यादा ही साथरोग कायदा अमलात असेपर्यंत लागू राहणार आहे. दरम्यान मास्क न वापरणाऱ्यावर दंडात्मक कारवाई करण्यात येत असून त्यामुळे मास्कच्या किमती सामान्यांना परवडणाऱ्या हव्यात यासाठी घेतलेल्या पुढाकाराला मुख्यमंत्री आणि उपमुख्यमंत्री यांनी मान्यता दिल्याचे आरोग्यमंत्र्यांनी सांगितले.
आरोग्यमंत्री म्हणाले कि , हॅण्ड सॅनिटायझर व मास्क यांच्या किंमतीत प्रचंड प्रमाणात वाढ झाल्याने त्याचा भुर्दंड सर्वसामान्य जनतेला भोगावा लागत असल्याचे निदर्शनास आले. त्यानुसार सॅनिटायझर व मास्कचे दर निश्चित करण्यासाठी समिती स्थापन करण्यात आली होती. या समितीने दर निश्चित करण्यापूर्वी उत्पादक कंपन्यांशी चर्चा केली. उत्पादक, पुरवठादार व वितरक यांचे उत्पादन क्षेत्र, कार्यालय, गोदाम यांना प्रत्यक्ष भेट दिली तसेच उत्पादित मालाच्या उत्पादनाचा खर्च व त्याची नक्त किंमत परिव्यय लेखा परिक्षक (Cost Auditor) यांच्या सहाय्याने निर्धारित केली आहे. ही अधिकतम विक्री मूल्य मर्यादा राज्यातील सर्व मास्क उत्पादक कंपन्या/वितरक/किरकोळ विक्रेते यांना लागू राहील.
या निर्णयानुसार राज्यातील सर्व मास्क उत्पादक कंपन्या/वितरक/किरकोळ विक्रेते यांनी मास्कचा दर्जा व त्याची निर्धारित कमाल विक्री किंमत दर्शनी भागावर लावणे आवश्यक राहील. या प्रकरणी काही तक्रार उद्भवल्यास, राज्य स्तरावर आयुक्त, अन्न व औषध प्रशासन व जिल्हा स्तरावर, जिल्हाधिकारी हे तक्रार निवारणासाठी सक्षम प्राधिकारी असतील. राज्यातील मास्कची आवश्यकता लक्षात घेता, उत्पादकाने राज्यात उत्पादित केलेला व राज्यात आवश्यक असलेला माल विहित दराने उपलब्ध करुन देणे आवश्यक राहील. रुग्ण सेवा देणाऱ्या महाराष्ट्रातील शासकीय व खासगी रुग्णालये/नर्सिंग होम/कोवीड केअर सेंटर/डेडीकेटेड कोविड हॉस्पिटल्स इ. यांना मास्कचा पुरवठा करताना मास्कच्या विहित अधिकतम विक्री मुल्य मर्यादेच्या ७० टक्के दराने उपलब्ध करून देणे आवश्यक राहील. व खाजगी रुग्णालयांनी उपरोक्त दराने मास्कची खरेदी केल्यानंतर खरेदी किंमतीच्या ११० टक्के पेक्षा जास्त रक्कम रुग्णांकडून आकारता येणार नाही असे शासन निर्णयात नमूद करण्यात आले आहे.