#CoronaVirusUpdates : राज्यातील रुग्णांच्या संख्येत घट , उपचारानंतर रुग्ण बरे होऊ लागले : राजेश टोपे
राज्यात गेल्या दोन-तीन दिवसांपासून करोनाबाधीत नवीन रुग्णांची संख्या झपाट्याने कमी होत आहे. कालच्या आणि आजच्या आकडेवारीची तुलना केल्यास नवीन रुग्णसंख्येत निम्म्यापेक्षा जास्त घट झाली आहे. गुरुवारी राज्यात करोनाचे २८६ नवीन रुग्ण आढळले होते. तर आज करोनाचे फक्त ११८ नवीन रुग्ण आढळून आले आहेत. करोनाचे रुग्ण बरे होण्याचे प्रमाणही वाढत आहे. आज दिवसभरात ३१ रुग्ण करोनामुक्त झाले आहेत. राज्यात आतापर्यंत ३३१ रुग्णांनी करोनाला मात दिली आहे.
राज्याचे आरोग्य मंत्री राजेश टोपे यांनी दिलेल्या माहितीनुसार महाराष्ट्रात शुक्रवारी ११८ करोनाबाधीत नवीन रुग्णांची नोंद झाली असून, राज्यात ७ करोनाबाधीत रुग्णांचा मृत्यू झाला आहे. यात मुंबईतील ५ आणि पुण्याचे २ रुग्ण आहेत. यामुळे राज्यात करोनाबाधीत रुग्णांची एकूण मृत्यूसंख्या २०१ झाली आहे. आज दिवसभरात ३१ जणांना रुग्णालयातून बरे झाल्यानंतर घरी पाठविण्यात आले आहे. राज्यातील एकूण करोनाबाधीत रुग्णांची संख्या ३ हजार २२० झाली आहे तर आजपर्यंत एकूण ३३१ करोनाबाधीत रुग्ण बरे होऊन घरी परत गेले आहेत.
मुंबई महापालिका हद्दीतील करोनाबाधीत रुग्णांची संख्या २ हजार ०८५ असून, एकूण मृत्यू १२२ आहेत. त्यापाठोपाठ पुणे महानगरपालिका हद्दीत एकूण रुग्ण संख्या ४५० असून, एकूण मृत्यू ४६ आहेत. आजपर्यंत पाठविण्यात आलेल्या ६१ हजार ७४० नमुन्यांपैकी ५६ हजार ९६४ जणांचे प्रयोगशाळा नमुने करोनाकरिता निगेटिव्ह आले असून, ३ हजार ३२० जणांचे अहवाल पॉझिटिव्ह आले आहेत. आज मृत्यू झालेल्या सात रुग्णांपैकी सहा रुग्ण हे ४० ते ६० वयोगटातील असून, एक जण ६० वर्षावरील आहे, असे टोपे यांनी सांगितले. सध्या राज्यात ७४ हजार ५८७ लोक होम क्वारंटाइनमध्ये असून ६ हजार ३७६ लोक संस्थात्मक क्वारंटाइनमध्ये आहेत, असे सांगण्यात आले.
राज्यातील जिल्हा आणि मनपानिहाय रुग्णांचा आतापर्यंतचा तपशील पुढीलप्रमाणे आहे : (कंसात मृत्यूंची आकडेवारी)
मुंबई महानगरपालिका: २०८५ (१२२) ,ठाणे: २९ (२), ठाणे मनपा: ९६ (१), नवी मुंबई मनपा: ६३ (३), कल्याण डोंबवली मनपा: ६८ (२), उल्हासनगर मनपा: १, भिवंडी निजामपूर , मनपा: १, मीरा भाईंदर मनपा: ५३ (२), पालघर: १४ (१), वसई विरार मनपा: ६१ (३), रायगड: ८, पनवेल मनपा: २८ (१), ठाणे मंडळ एकूण: २५०७ (१३७), नाशिक: ३, नाशिक मनपा: ५, मालेगाव मनपा : ४५ (२), अहमदनगर: १९ (१), अहमदनगर मनपा: ९, धुळे: १ (१), धुळे मनपा: ०, जळगाव: ०, जळगाव मनपा: २ (१), नंदूरबार: ०, नाशिक मंडळ एकूण: ८४ (५), पुणे: १७, पुणे मनपा: ४५० (४६), पिंपरी चिंचवड मनपा: ३७ (१), सोलापूर: ०, सोलापूर मनपा: १२ (१), सातारा: ७ (२), पुणे मंडळ एकूण: ५२३ (५०), कोल्हापूर: २, कोल्हापूर मनपा: ३, सांगली: २६, सांगली मिरज कुपवाड मनपा:०, सिंधुदुर्ग: १, रत्नागिरी: ६ (१), कोल्हापूर मंडळ एकूण: ३८ (१), औरंगाबाद:०, औरंगाबाद मनपा: २८ (२), जालना: २, हिंगोली: १, परभणी: ०, परभणी मनपा: १, औरंगाबाद मंडळ एकूण: ३२ (२), लातूर: ८, लातूर मनपा: ०, उस्मानाबाद: ३, बीड: १, नांदेड: ०, नांदेड मनपा: ०, लातूर मंडळ एकूण: १२, अकोला: ७ (१), अकोला मनपा: ७, अमरावती: ०, अमरावती मनपा: ५ (१), यवतमाळ: १३, बुलढाणा: २१ (१), वाशिम: १, अकोला मंडळ एकूण: ५४ (३), नागपूर: २, नागपूर मनपा: ५५ (१), वर्धा: ०, भंडारा: ०, गोंदिया: १, चंद्रपूर: ०, चंद्रपूर मनपा: २, गडचिरोली: ०, नागपूर मंडळ एकूण: ६० (१), इतर राज्ये: ११ (२), एकूण: ३३२० (२०१)