पाच हजारच्या वादातून मित्रांनीच केला मित्राचा खून
पाच हजारच्या वादातून दारूच्या नशेत असलेल्या दोघा मित्रांनीच दगडाने ठेचून मित्राचा खून केल्याची घटना शुक्रवारी मध्यरात्री विक्रमनगर परिसरात घडली. हैदर शहानूर कलावंत (वय २४, रा. गणेशनगर) असे त्याचे नाव आहे. खून केल्यानंतर हैदरच्या मृतदेहाची विल्हेवाट लावण्यासाठी मोटारसायकलवरून घेऊन जात असताना ही घटना उघडकीस आली. याप्रकरणी गावभाग पोलिसांनी गणेश नारायण इंगळे (वय २३, रा. गौरीशंकरनगर, खोतवाडी) आणि योगेश हणमंत शिंदे (वय २३, रा. गणेशनगर) यांना अटक केली आहे.
याबाबत पोलिसांनी दिलेली अधिक माहिती अशी कि , हैदर कलावंत हा यंत्रमाग कामगार असून, गणेश इंगळे व योगेश शिंदे हे त्याचे मित्र आहेत. या तिघांनाही दारूचे व्यसन असून ते रेकॉर्डवरचे गुन्हेगार आहेत. काही दिवसांपूर्वी हैदरचा मोबाइल त्याच्या कामाच्या ठिकाणावरून चोरीस गेला होता. याप्रकरणी हैदरचा एकावर संशय होता. मोबाइल चोरीतील संशयित युवकास मारहाण करण्यासाठी हैदरने गणेश व योगेश यांना सांगितले होते. त्या मोबदल्यात त्यांना दारू आणि पाच हजार रुपये देतो, असे हैदरने सांगितले होते. शुक्रवारी सायंकाळी गणेश व योगेश मोबाइल चोरीचा संशय असलेल्या तरुणाला मारहाण करण्यासाठी गेले होते. परंतु त्यावेळी त्या भागातील नागरिकांनीच त्यांना पकडून चोप दिल्याने ते रिकाम्या हाताने परत आले होते. मात्र, संशयित चोरट्याला अद्दल घडविल्याने शुक्रवारी रात्री गणेश व योगेश यांनी हैदरकडे दारू व पैशाची मागणी केली. ठरल्यानुसार हैदरने त्यांना पार्टी देण्यासाठी आरगे मळ्यातील मैदानात नेले. त्याठिकाणी मद्यपान सुरू असतानाच गणेश व योगेश यांनी हैदरकडे पाच हजारांची मागणी केली. त्यावरून त्यांच्यात वाद झाला. यावेळी गणेश व योगेशने दगडाने हैदरवर हल्ला चढविला. त्यात तो गंभीर जखमी झाला.
दरम्यान हैदरचा मृत्यू झाल्याचे समजून त्यांनी पोलिसांच्या भीतीने त्याला अन्यत्र ठिकाणी टाकण्यासाठी मोटारसायकलवर बसवले. आरगे भवन परिसरातून ते राजवाडा चौकमार्गे बोरगावच्या दिशेने निघाले होते. मोटारसायकलीवर तिघे जण असल्याने गस्तीवर असलेल्या पोलिसाने त्यांना थांबविले. मात्र, मित्र जखमी असून त्याला रुग्णालयात घेऊन जात असल्याचे त्यांनी सांगितले. तेथून पुढे ते जुना चंदूर रोड परिसरात गेले. तेथे गृहरक्षक दलाचा जवान व काही नागरिकांनी दुर्गामाता परिसरात त्यांना संशयावरून अडविले आणि पोलिसांच्या ताब्यात दिले. जखमी हैदरला उपचारासाठी आयजीएममध्ये दाखल केले; परंतु उपचारापूर्वीच त्याचा मृत्यू झाल्याचे वैद्यकीय अधिकाऱ्यांनी सांगितले. त्यामुळे शिवाजीनगर पोलिसांत आकस्मित मृत्यूची अशी नोंद करण्यात आली. पण चौकशीत खुनाची घटना उघडकीस आली.
पोलिसांनी केलेल्या तपासात आरगे मळा घटनास्थळी रक्ताने माखलेला दगड तसेच मृताचे चप्पल पडले होते. मृत हैदर अविवाहित असून, त्याच्या पश्‍चात आई, वडील, भाऊ, बहिण असा परिवार आहे. दरम्यान, गणेश व योगेश संशयित रेकॉर्डवरील गुन्हेगार आहेत. त्यांच्यावर कडक कारवाई करावी यासाठी मृत हैदरच्या नातेवाइकांसह भागातील नागरिकांनी शिवाजीनगर पोलिस ठाण्यावर मोर्चा काढला.