Welcome to   Click to listen highlighted text! Welcome to

कर्नाटकचे मुख्यमंत्री येडियुरप्पा यांचा व्हायरल व्हिडीओ राष्ट्रपतींकडे सुपूर्द , सरकार बरखास्तीची मागणी

Spread the love

कर्नाटकचे मुख्यमंत्री आणि भाजपचे ज्येष्ठ नेते बी. एस. येडियुरप्पा यांचा एक कथित व्हिडिओ बाहेर आल्याने भाजपच्या अडचणी वाढल्या आहेत. या व्हिडिओत भाजपच्या कर्नाटकातील ‘ऑपरेशन लोट्स’ची पोलखोल करण्यात आली आहे. त्यामुळे काँग्रेसने या मुद्द्यावरून कर्नाटकातील भाजप सरकार बरखास्त करावं आणि केंद्रीय गृहमंत्री अमित शहा यांना पदावरून हटविण्यात यावं अशी मागणी काँग्रेसने राष्ट्रपतींकडे केली आहे.

हा व्हिडिओ व्हायरल झाल्याने काँग्रेस आणि जेडीएसने भाजपवर निशाणा साधला आहे. कर्नाटक सरकार बरखास्त करण्यासाठी आणि अमित शहांना हटवण्यासाठी काँग्रेसने कर्नाटकच्या राज्यपालांच्या माध्यमातून राष्ट्रपती रामनाथ कोविंद यांना एक निवेदन सादर केलं आहे. ‘येडियुरप्पा आणि अमित शहा यांनी १५ आमदारांना राजीनामा देण्यासाठी भाग पाडले आणि कर्नाटकातील काँग्रेस-जेडीएसचं सरकार पाडण्यात आलं’, असं काँग्रेसने या निवेदनात म्हटलं आहे. काँग्रेसने एका पेन ड्राइव्हमध्ये हा व्हिडिओ सेव्ह करून हा पेन ड्राइव्ह राष्ट्रपतींकडे पाठवला आहे.

दरम्यान, व्हायरल झालेल्या या व्हिडिओत मुख्यमंत्री येडियुरप्पा भाजपच्या एका बैठकीला संबोधित करताना दिसत आहेत. भाजपचे नेते अमित शहा आणि इतर राष्ट्रीय नेत्यांच्या आदेशानंतर राज्यात ऑपरेशन लोट्स सुरू करण्यात आल्याचं येडियुरप्पा सांगताना दिसत आहेत.

विशेष म्हणजे या व्हिडिओमध्ये केवळ ऑडिओ ऐकला येतोय. येडियुरप्पा हे मिटींगला संबोधित करतानाचं चित्र दिसत नाहीये. हा व्हिडिओ व्हायरल झाल्यानंतर येडियुरप्पा यांनी सर्व आरोप फेटाळून लावले आहेत. ‘कर्नाटकातील काँग्रेस-जेडीएस आघाडी सरकारवरील नाराजीतूनच या आमदारांनी राजीनामा दिला होता. त्यामुळेच आम्ही राज्यात सरकार स्थापन केलं’, असं येडियुरप्पा यांनी म्हटलं आहे.

‘भाजपने काँग्रेस आणि जेडीएसच्या आमदारांना पैशाचं अमिष दाखवून त्यांना फोडल्याचं या व्हिडिओमधून स्पष्ट झालं आहे. भाजपने नेहमीच सरकारी यंत्रणांचा धाक दाखवून आमदारांना आपल्या गोटात सामिल करून घेतलं आहे. त्यामुळे आता आम्ही हा व्हिडिओ घेऊन सर्वोच्च न्यायालयात जाऊन दाद मागणार आहोत’, असं काँग्रेसचे नेते के. सी. वेणूगोपाल यांनी सांगितलं.

आपलं सरकार

Click to listen highlighted text!