पाळणाघरात सोडलेल्या ४ वर्षीय बालिकेवर सुरक्षा रक्षकांचा लैंगिक अत्याचार
माणुसकीला आणि विश्वासाला काळिमा फासणारी घटना ठाणे शहरात घडली आहे. बँकेच्या एटिएम मशीनध्ये सिक्युरिटी गार्ड म्हणून काम करणाऱ्या माणसानेच चिमुरडीवर बलात्कार केल्याचं उघड झालं आहे. ही चार वर्षांची मुलगी पाळणाघरात असताना या नराधमाने तिच्यावर बलात्कार केला. दशरथ कांबळे या ४२ वर्षांच्या सुरक्षा रक्षकानेच हा गुन्हा केला आहे. पोलिसांनी दिलेल्या माहितीनुसार, ही घटना रविवारी घडली. सकाळी या मुलीच्या आईने तिला नेहमीच्या पाळणाघरात नेऊन सोडलं आणि ती कामाला गेली.
दशरथ कांबळे तिथून जवळच असलेल्या एटीएममध्ये सुरक्षा रक्षक म्हणून काम करत असे. तो पाळणाघरात आला आणि या मुलीला बरोबर घेऊन गेला. तिला गंमत दाखवतो, काही नवं शिकवतो असं सांगून त्यानं तिला आपल्याबरोबर यायला सांगितलं. ती मुलगी कांबळेच्या मागे गेली तेव्हा त्यानं तिला एका निर्जन ठिकाणी नेऊन बलात्कार केला.
चार वर्षांची चिमुरडी संध्याकाळी आईबरोबर घरी गेली, तेव्हा घाबरलेली होती. आईला तिच्या वागण्यात बदल जाणवला. तिने तिच्याकडे नीट चौकशी केली तेव्हा त्या मुलीने घडलेला प्रसंग सांगितला. आईने तातडीने पोलिसात तक्रार दाखल केली. ठाणे पोलिसांनी सोमवारी आरोपीला अटक केली. पुढचा तपास पोलीस करत आहेत. पण या घटनेमुळे ठाण्याच्या यशोधन नगर परिसरात खळबळ उडाली आहे.