गोविंद पानसरे खूनप्रकरणी शरद कळसकरला ८ दिवसांची पोलीस कोठडी
कॉम्रेड गोविंद पानसरे हत्येप्रकरणी एसआयटीने राष्ट्रीय तपास यंत्रणेच्या (एनआयए) ताब्यातून शरद भाऊसाहेब कळसकर (वय २५, रा. केसापुरी, ता. दौलताबाद, जि. औरंगाबाद) या संशयितास मंगळवारी (ता. ११) अटक केली. जिल्हा कोर्टात हजर केले असता कळसकरला आठ दिवसांची पोलीस कोठडी मिळाली. कळसकरचा मुंबईत सापडलेल्या शस्त्रसाठ्यासह डॉ. नरेंद्र दाभोलकर आणि कर्नाटकातील ज्येष्ठ पत्रकार गौरी लंकेश यांच्या हत्येतही सहभाग आहे. पानसरे हत्येतील शस्त्रांची विल्हेवाट लावण्याची जबाबदारी कळसकरवर होती, असा दावा एसआयटीने कोर्टात केला.
कॉम्रेड गोविंद पानसरे यांच्यावर गोळ्या झाडून हत्या झाल्यानंतर एसआयटीने समीर विष्णू गायकवाड या संशयितास अटक केली होती. त्यानंतर अंनिसचे डॉ. नरेंद्र दाभोलकर यांच्या हत्येप्रकरणी सीबीआयने अटक केलेला संशयित डॉ. वीरेंद्रसिंह तावडे याला एसआयटीने अटक केली. डॉ. दाभोलकर, कॉम्रेड पानसरे आणि कर्नाटकातील गौरी लंकेश या तिन्ही हत्यांमध्ये साम्य आढळल्याने दोन्ही राज्यातील तपास यंत्रणांकडून समन्वयाने तपास सुरू होता. दरम्यान, मुंबई येथे दहशतवाद विरोधी पथकास (एटीएस) बेकायदेशीर शस्त्रसाठा सापडल्यानंतर हाती लागलेल्या संशयितांच्या माध्यमातून तिन्ही हत्यांमधील महत्त्वाचे धागेदोरे पोलिसांना मिळाले. अवैध शस्त्रसाठा बाळगल्याप्रकरणी एटीएसने अटक केलेला संशयित कळसकर याला डॉ. दाभोलकर आणि लंकेश हत्येप्रकरणीही अटक झाली होती. त्याने दोन्ही ठिकाणी विसंगत जबाब दिल्याने त्याच्यावरील संशय बळावला.
यावरून एसआयटीने पानसरे हत्येप्रकरणी २४ ऑगस्ट २०१८ मध्ये त्याचा जबाब नोंदवला होता. त्या जबाबातील माहितीची खातरजमा केल्यानंतर कळसकरचा पानसरे हत्येतील सहभाग समोर आला आहे.
पानसरे यांच्यावर हल्ला झाल्यानंतर गुन्ह्यातील शस्त्र कोवाडमार्गे बेळगावमध्ये पोहोचवण्यात आले. हे काम भारत कुरणे आणि सागर लाखे या दोघांनी केले होते. यानंतर शस्त्राचे पार्ट काढून त्याची विल्हेवाट लावण्याची जबाबादारी कळसकर याच्याकडे सोपवली होती. पानसरे यांच्या हत्येच्या चार ते पाच दिवस आधी कळसकरचे कोल्हापुरात वास्तव्य होते. कोल्हापुरातील काही मित्रांशीही त्याचे वारंवार मोबाइलवरून संभाषण झाले आहे.
हाती लगालेल्या पुराव्यांच्या आधारे एसआटीने सोमवारी मुंबई येथून कोर्टाच्या परवानगीने एनआयएच्या ताब्यातून कळसकरला अटक केली. मंगळवारी सकाळी त्याला कसबा बावडा येथील जिल्हा कोर्टात प्रथमवर्ग न्यायदंडाधिकारी एस. एस. राऊळ यांच्यासमोर हजर केले. कळसकर याच्यावर गौरी लंकेश हत्येप्रकरणी आरोपपत्र दाखल आहे. त्याच्या जबाबासह अन्य संशयितांकडून मिळालेल्या माहितीनुसार त्याचा गुन्ह्यातील सहभाग स्पष्ट झाला आहे. त्याने शस्त्राची विल्हेवाट लावली आहे. याच्या तपासासाठी दहा दिवसांची पोलिस कोठडी मिळावी, अशी मागणी सरकारी वकील शिवाजी राणे यांनी कोर्टात केली. सरकारी वकिलांनी केलेला युक्तीवाद ग्राह्य मानून न्यायाधीश रावळ यांनी संशयित कळसकर यास आठ दिवसांची पोलिस कोठडी सुनावली.