“पबजी”च्या नादात मन्सूर इनामदारने आपला जीव गमावला , नवीन मोबाईलवरील खेळाने केला घात !!
राहुरी तालुक्यातील आंबी गावातील तरुणाने मोबाइलवर तास अन् तास पबजी गेम खेळल्यानंतर नदीपात्रातील झाडाला गळफास घेऊन आत्महत्या केली. आज दुपारी चार वाजण्याच्या सुमारास ही घटना घडली. फारूक मन्सूर इनामदार (वय १९) असे आत्महत्या केलेल्या तरुणाचे नाव आहे. फारूकने दोन महिन्यांपूर्वीच नवीन मोबाइल खरेदी केला होता. त्यावर तो दररोज आठ-आठ तास गेम खेळत होता, आत्महत्या केलेल्या तरुणाच्या नातेवाइकांनी ही माहिती पोलिसांना दिली.
ग्रामस्थांनी दिलेल्या माहितीनुसार फारूक मन्सूर इनामदार हा मोलमजुरी करून आपली उपजिविका भागवायचा. दोन महिन्यांपूर्वी त्याने चांगला मोबाइल खरेदी केला होता. मोबाइल खरेदी केल्यानंतर तो दररोज आठ ते दहा तास मोबाइलवर पबजी व इतर गेम खेळत होता. बुधवारी दिवसभर तो मोबाइलवर गेम खेळल्यानंतर जेवन करून प्रवरा नदीकडे गेला होता. त्या ठिकाणी एका झाडाला दोरीच्या सह्याने गळफास घेऊन त्याने आत्महत्या केली. त्याचा भाऊ शाहरुख इनामदार याने भाऊ फारूक याचा मृतदेह झाडाला लटकत असल्याचा पाहिला. त्यानंतर गावातील पोलिस पाटील बाळासाहेब लोंढे यांनी राहुरी पोलिस स्टेशनला माहिती दिली. राहुरी पोलिसांनी सायंकाळी घटनास्थळी जावून मृतदेह ताब्यात घेतला. त्या ठिकाणी एक मोबाइल आढळून आल्याची माहिती पोलिसांनी दिली. आत्महत्या करणारा तरुण हा नवीन मोबाइल घेतल्यापासून अनेक तास मोबाइलवर गेम खेळताना दिसायचा, अशी माहिती ग्रामस्थांनी पोलिसांना दिली आहे.