देशहिताच्या बाबतीत काॅंग्रेस मोदी सरकार बरोबर
भारत देश आणि देशाच्या नागरिकांची प्रगती आणि विकासासाठी आम्ही नव्या सरकारच्या सोबत काम करण्यासाठी तयार आहोत असे ट्विट काँग्रेसने केले आहे.पंतप्रधान नरेंद्र मोदी आणि नव्या सरकारच्या मंत्र्यांच्या शपथविधी समारोहात सोनिया गांधी, राहुल गांधी, मनमोहन सिंग यांची उपस्थिती होती.
काँग्रेस अध्यक्ष राहुल गांधी, यूपीएच्या प्रमुख सोनिया गांधी आणि माजी पंतप्रधान डॉ. मनमोहन सिंग उपस्थित होते. लोकसभेत विरोधी पक्षनेतेपदासाठी आवश्यक असलेल्या लोकसभेच्या ५५ जागा याही वेळेला काँग्रेसला मिळवता आलेल्या नाहीत. या वेळी काँग्रेसच्या देशभरात फक्त ५२ जागा जिंकून आल्या आहेत. भारतीय जनता पक्षाला मात्र ३०३ जागा मिळाल्या आहेत. गेल्या वेळी काँग्रेसला फक्त ४४ जागा जिंकता आल्या होत्या.
गुरुवारी संध्याकाळी पंतप्रधान नरेंद्र मोदी पद आणि गोपनीयतेची शपथ घेत असताना विरोधी पक्ष असलेल्या काँग्रेसने ट्विट करत पंतप्रधान मोदी यांना शुभेच्छा दिल्या.