Rajsthan : अलवर बलात्कार पीडितेला पोलीस दलात नोकरी देण्याचा शासन निर्णय

राजस्थानमधील अलवर येथील सामूहिक बलात्कार प्रकरणातील पीडित महिलेला राज्य पोलीस दलात कॉन्स्टेबल म्हणून नोकरी देण्यात आली आहे. राज्य मंत्रिमंडळाच्या आजच्या बैठकीत या निर्णयावर शिक्कामोर्तब करण्यात आलं. पीडीतेला लवकरच नियुक्तीपत्र दिलं जाणार आहे.  २६ एप्रिल रोजी हा धक्कादायक प्रकार घडला होता. पीडित महिलेवर तिच्या पतीसमक्ष नराधमांनी तीन तास सामूहिक बलात्कार केला होता. या घटनेने देशभरात खळबळ उडाली होती.

लोकसभा निवडणुकीच्या प्रचारादरम्यानही काँग्रेस आणि भाजपात यावरून आरोप-प्रत्यारोपाच्या फैरी झडल्या होत्या. राज्यातील काँग्रेस सरकारने हे प्रकरण दडपण्याचा प्रयत्न केल्याचा आरोप पंतप्रधान नरेंद्र मोदी यांनी केला होता. दरम्यान, काँग्रेस अध्यक्ष राहुल गांधी व राज्याचे मुख्यमंत्री अशोक गेहलोत यांनी पीडित महिलेची भेट घेऊन तिला न्याय देण्याचे आश्वासन दिले होते. त्यानुसार याप्रकरणातील ६ आरोपींविरुद्ध अलवरच्या विशेष एससी-एसटी न्यायालयात आरोपपत्र दाखल करण्यात आले आहे. यात ५ जण मुख्य आरोपी आहेत तर या घटनेचं व्हिडिओ शूटिंग करणारा एकजण आहे.

एकीकडे हे प्रकरण न्यायालयात पोहचलं असताना दुसरीकडे पीडितेला पोलीस दलात कॉन्स्टेबलची नोकरी देवून दिलासा देण्याचा प्रयत्न सरकारने केला आहे. गृहविभागाने याअनुशंगाने सारी प्रक्रिया पूर्ण केली आहे. वित्त आणि विधी विभागाच्या मंजुरीनंतर ही फाइल मंत्रिमंडळाकडे पाठवण्यात आली होती. तिथे आज या फाइलला मंजुरी देण्यात आली आहे.