आसारामपूत्र नारायण साईला बलात्कार प्रकरणी जन्मठेपेची शिक्षा
अल्पवयीन मुलीवरील बलात्कार प्रकरणी जन्मठेपेची शिक्षा भोगणारा आध्यात्मिक गुरू आसाराम बापू याचा मुलगा नारायण साई यालाही बलात्कार प्रकरणी जन्मठेपेची शिक्षा सुनावण्यात आली आहे. सुरतमधील कोर्टाने हा निकाल दिला आहे. आसाराम बापू आणि नारायण साईने बलात्कार केल्याचा आरोप आश्रमात राहणाऱ्या दोन बहिणींनी केला होता.
याप्रकरणी सुरतमध्ये पोलिसांनी २०१३मध्ये गुन्हा नोंदवला होता. बलात्काराच्या आरोपानंतर पोलिसांनी नारायण साई याला डिसेंबर २०१३मध्ये अटक केली होती. २००२ आणि २००५मध्ये नारायण साईने अनेकवेळा बालत्कार केला, असं दोन्ही बहिणींनी पोलिसांना सांगितलं होतं.
सुरतमध्ये राहणाऱ्या या दोन्ही बहिणींनी नारायण साई आणि आसाराम बापूविरोधात पोलिसात तक्रार करत त्यांच्या काळ्या कारभाराविरोधात आवाज उठवला होता. दोन्ही बहिणींनी नारायण साई आणि आसाराम बापूविरोधात लैंगिक शोषणाच्या वेगवेगळ्या तक्रारी केल्या. शाहजहापूरच्या अल्पवयीन मुलीवरील बलात्कार प्रकरणी जोधपूर कोर्टाने आसाराम बापूला गेल्या वर्षीच जन्मठेपेची शिक्षा सुनावली आहे.