Pulwama Attack: चाकण येथे संशयित दहशतवाद्यास बिहार एटीएसकडून अटक , ट्रान्झिट रिमांड मंजूर
पुलवामा हल्ल्यानंतर जवानांच्या पोस्टिंग डिटेल्सची प्रिंट जवळ बाळगणाऱ्या संशयित दहशतवाद्यांच्या साथीदारास पुण्यातील चाकण परिसरातून बिहार एटीएसने आज अटक केली असून विशेष न्यायाधीश किशोर वडणे यांच्या कोर्टने त्याला ट्रान्झिट रिमांड मंजूर केला. शरियत मंडल असे अटक करण्यात आलेल्या संशयिताचे नाव आहे. तर बिहारमधील पाटणा जंक्शन येथे एटीएसने खैरूल मंडल आणि अबू सुलतान या दोघा बांगलादेशींना काही दिवसांपूर्वी अटक केली होती. त्यांच्या चौकशीमध्ये शरियतचे नाव पुढे आले. त्यानंतर बिहार एटीएसने पुणे एटीएसच्या मदतीने चाकण पट्ट्यात छापा मारून शरियत याला अटक केली. पुलवामा येथे दहशतवादी हल्ल्यात ४० जवान शहीद झाले होते.
खैरूल मंडल आणि अबू सुलतान या दोघांकडे सीआरपीएफ जवानांच्या पोस्टिंग डिटेल्सची प्रिंट आढळून आली होती. तसेच इतर अनेक महत्त्वाची कागतपत्रं सापडली. यामुळे देशातील तपास यंत्रणा देखील चक्रावून गेल्या आहेत. खैरूल मंडल आणि अबू सुलतान या दोघांच्या चौकशीत शरियत याचे नाव पुढे आले. हे तिघे जण इस्लामिक स्टेट बांगलादेश आणि आयसिस सह जमीयत-उल-मुजाहिद्दीन या दहशतवादी संघटनेचे सक्रीय सदस्य आहेत. दिल्ली, मुंबई आणि गोव्यात दहशतवादी हल्ले घडवण्याची या दहशतवादी संघटनांची योजना असल्याची माहिती गुप्तचर यंत्रणांनी दिली आहे. त्यामुळे मुंबई, दिल्ली आणि गोव्यात हाय अलर्ट जारी करण्यात आला आहे. दिल्ली, मुंबई आणि गोव्यातील धर्मस्थळांवर दहशतवादी हल्ला करण्याचा दहशतवादी संघटनांचा कट आहे. त्यामुळे सुरक्षा व्यवस्थेमध्ये देखील वाढ करण्यात आली आहे.
दरम्यान, शरियत मंडलला अटक करण्यापूर्वी पटना येथून दोन आरोपींना तीन दिवसांपूर्वी अटक करण्यात आली होती. त्या दोघांच्या संपर्कात मंडल होता. न्यायालयात त्याला ट्रान्झिट रिमांडसाठी हजर करण्यात आले होते. मंडलने या दोघांच्या संपर्कात असल्याचे मान्य केले. मला त्यांची दहशतवादी पार्श्वभूमी माहीत होती. ते मला जिहादबद्दल मौलवीचे व्हिडिओ पाठवत होते. मला व्हिडिओ कॉल करून दहशतवादी प्रशिक्षण बद्दल माहिती देत असत. मात्र, मी यातील कोणत्या गोष्टीत सहभागी नाही असे त्याने कोर्टात सांगितले. विशेष न्यायाधीश किशोर वडणे यांच्या कोर्टने त्याला ट्रान्झिट रिमांड मंजूर केला