मी इतरांच्या पोरांचेही लाड करतो, इतरांची पोरं नुसती धुणीभांडी करण्यासाठी नसतात : उद्धव ठाकरे
‘मी माझ्या पोरांसोबत इतरांच्या पोरांचेही लाड करतो. इतरांची पोरं नुसती धुणीभांडी करण्यासाठी असतात असं आम्ही समजत नाही,’ असा टोला शिवसेनेचे पक्षप्रमुख उद्धव ठाकरे यांनी राष्ट्रवादी काँग्रेसचे अध्यक्ष शरद पवार यांना हाणला आहे. दरम्यान शिवसेनेचे युवा नेते आदित्य ठाकरे लोकसभा निवडणूक लढणार कि नाही याबाबत बोलताना ‘सध्या तरी आदित्य निवडणूक लढवणार नाही. भविष्यात त्यानं निवडणूक लढवायची की नाही हा निर्णय त्याचा आणि शिवसैनिकांचा आहे,’ असं उद्धव म्हणाले.
अहमदनगरमधून लोकसभा निवडणूक लढविण्यासाठी आग्रही असलेले काँग्रेसचे ज्येष्ठ नेते राधाकृष्ण विखे-पाटील यांचे पुत्र सुजय यांनी नुकताच भाजपमध्ये प्रवेश केला. भाजप प्रवेशानंतर आज सुजय यांनी ‘मातोश्री’ निवासस्थानी जाऊन उद्धव यांची भेट घेतली. यावेळी झालेल्या पत्रकार परिषदेत उद्धव यांनी पत्रकारांच्या अनेक प्रश्नांना उत्तरं दिली.
राष्ट्रवादी काँग्रेसनं नगरची जागा काँग्रेसला न सोडल्यानंच नाइलाजानं विखेंना हा निर्णय घ्यावा लागल्याची चर्चा आहे. त्याबद्दल बोलताना ‘आपल्या मुलाचा हट्ट ज्याचा त्यानं पुरवावा. दुसऱ्यांच्या मुलाचा हट्ट मी का पुरवू,’ असं टोला शरद पवार यांनी हाणला होता. पवारांच्या याच वक्तव्याचा धागा पकडून उद्धव यांनी पवारांना चिमटा काढला. ‘आम्ही दुसऱ्यांच्या मुलांचेही लाड करतो. इतरांची पोरं केवळ धुणीभांडी करण्यासाठी असतात, असा माझ्या पक्षाचा विचार कधीच नव्हता आणि असू शकत नाही. शिवसेना ही सर्वसामान्यांसाठीच आहे,’ असं ते म्हणाले.
शरद पवार यांनी सुरुवातीला माढ्यातून निवडणूक लढण्याची केलेली घोषणा, पार्थ पवारांच्या उमेदवारीला केलेला विरोध, नंतर नातवासाठीच घेतलेली माघार, या साऱ्या घडामोडींबद्दल उद्धव यांना विचारले असता उद्धव म्हणाले, ‘जे काही चाललंय, ते पवारांच्या नीतीला अनुसरूनच आहे. आम्ही बोलतो ते करतो, ते बोलतात त्याच्या उलटं करतात.’