संसद, संशयित कार आणि धावपळ…
संसद परिसरात एक संशयित कार घुसल्याने सुरक्षा यंत्रणेची एकच धावपळ उडाली. कार दुभाजकाला धडकल्याने जोरदार आवाज झाला. या आवाजामुळे संसद परिसरात गोंधळ उडाला आणि सुरक्षा रक्षकांनी कार अडवली. ही कार चुकीच्या प्रवेशद्वारातून संसद परिसरात घुसली होती. २००१मध्ये झालेल्या हल्ल्यावेळी दहशतवादी याच गेटने संसद परिसरात घुसले होते.
संसदेच्या आवारात घडलेल्या आजच्या घटनेनंतर पुन्हा एकदा सुरक्षेवर प्रश्न चिन्ह उपस्थित झालं आहे. पण ही कार एका खासदाराची होती. कारचा बूमला चुकून स्पर्श झाला आणि सुरक्षा यंत्रणेचा अलार्म वाजला. तसंच गाडीचे एअर बॅगही उघडले. यामुळे सुरक्षा रक्षक सतर्क झाले आणि त्यांनी गेटवर लक्ष्य केंद्रीत केले. कार दुभाजकाला धडकल्याने चालक किरकोळ जखमी झाला. त्याची प्रकृती स्थिर आहे.