अखेर राफेलवरील कॅग अहवाल राष्ट्रपतींकडे
काँग्रेसकडून राफेल करारातील कथित अनियमिततेवरून केंद्र सरकारवर सातत्याने होत असलेल्या आरोपांदरम्यान नियंत्रक आणि महालेखा परीक्षकांनी आपला अहवाल राष्ट्रपतींकडे पाठवला आहे. राफेल घोटाळ्यावरून काँग्रेससह अनेक विरोधी पक्षांनी केंद्राला घेरलं आहे. त्यामुळेच या करारासंदर्भातील कॅग अहवाल संसदेत मांडला जाण्याची अनेक जण वाट पाहात आहेत.
कॅगने आपला अहवाल अधिकृतपणे राष्ट्रपती भवनाकडे पाठवला असल्याचे टाइम्स नाऊचे वृत्त आहे. कॅग आपल्या अहवालाची एक प्रत राष्ट्रपती आणि दुसरी प्रत अर्थ मंत्रालयाला पाठवते. कॅगने राफेल प्रकरणी १२ प्रकरणांचा विस्तृत अहवाल तयार केला आहे. काही आठवड्यांपूर्वी संरक्षण मंत्रालयाने राफेलवर आपले विस्तृत उत्तर कॅगला पाठवले होते. खरेदी प्रक्रियेसह ३६ राफेल विमानांची किंमतही यात सांगितलेली होती.
प्रोटोकॉलनुसार कॅगचा अहवाल सर्वात आधी राष्ट्रपतींना पाठवण्यात आला आहे. राष्ट्रपती भवनातून कॅग अहवाल लोकसभा अध्यक्षांच्या कार्यालयात आणि राज्यसभेच्या सभापतींच्या कार्यालयात पाठवण्यात येईल. अर्थसंकल्पीय अधिवेशनाचं सत्र बुधवारी संपत आहे. त्यामुळे मंगळवारी किंवा बुधवारी राफेलवरील कॅग अहवाल संसदेत पटलावर ठेवला जाऊ शकतो.